3-6 iyun 2026-cı il tarixlərində Gürcüstanda Tbilisi şəhərində 14-ci Beynəlxalq Qastroenteroloji Simpozium (İSG) keçirildi. Zəngin elmi proqramları və qeniş qastroenteroloji beynəlxalq diskussiya meydanı kimi ad qazanmış bu simpoziumda müasir qastroenteroloji problemlərin açıqlanması ilə yanaşı, aparılan yeni araşdırmalar və hazırlıq mərhələsində olan yenilənmiş konsensus və tövsiyələrin təqdimatı həmişəki kimi böyük maraq ilə qarşılandı. Tədbirdə Ə.Əliyev adına Azərbaycan Dövlət Həkimləri Təkmilləşdirmə İnstitutunun terapiya kafedrasının dosenti Gülüstan Babayeva da iştirak etdi.
İSG ənənələrindən biri də son 2 il ərzində ən innovativ elmi araşdırmalar aparmış və alınan nəticələri elmi məqalə kimi təqdim etmiş tədqiqatçılara təqdim olunan “Dr.Bares Award” mükafatının verilməsidir. 2026-cı ilin mart ayinda baş tutan “Dr.Bares Award” beynəlxalq elmi məqalə yarısmasında dosent Gulustan Babayevanın rəhbərlik etdiyi müəlliflər qrupunun 2 elmi məqaləsi qalib müəllif sertifikatına layiq görülmüşdur. Həmin sertifikatlar 14-ci Beynəlxalq Qastroenteroloji Simpozium zamanı PRO.MED CS Direktorlar Şurasının sədri Dkfm. Tomas W. Bares tərəfindən təqdim edilmişdir.