28–30 may 2026-cı il tarixlərində Tbilisi şəhərində 4-cü Beynəlxalq Transqafqaz Dermatologiya və Estetik Tibb Konqresi (ITC2026) keçirildi. Tədbirdə Böyük Britaniya, Gürcüstan, Özbəkistan, Qazaxıstan, Latviya və Azərbaycandan olan tanınmış alim və mütəxəssislər bir araya gəldilər.
Bu mötəbər konqresdə ölkəmizi Ə.Əliyev adına Azərbaycan Dövlət Həkimləri Təkmilləşdirmə İnstitutunun dermatovenerologiya kafedrasının əməkdaşları təmsil etdi. Kafedra müdiri, professor Sənan Kərimovun konqresin elmi proqramı çərçivəsində etdiyi «Epigenetika və bazal hüceyrəli karsinoma» mövzusundakı fundamental məruzəsi xarici həmkarlar tərəfindən maraqla qarşılandı və böyük rezonans doğurdu. Tibbi təhsilin təşkilinə həsr olunmuş dəyirmi masada isə professor ölkəmizin bu sahədəki qabaqcıl təcrübəsindən danışdı, rəhbərlik etdiyi kafedradakı müasir tədris metodları və innovativ prinsiplər barədə konqres iştirakçılarına ətraflı məlumat verdi. Kafedranın rezidenti Lamiyə Əhmədovanın nadir patologiyalardan sayılan “Lipoid proteinoz xəstəliyinin diaqnostikası və müasir müalicə metodları”na həsr olunmuş çıxışı gənc alimlər bölməsində fərqlənən məruzələrdən biri oldu.
ITC2026 konqresindəki bu uğurlu iştirak beynəlxalq akademik əlaqələrin güclənməsinə və təcrübə mübadiləsinə, eyni zamanda Azərbaycan dermatovenerologiya məktəbinin yüksək standartlarının beynəlxalq arenada bir daha qürurlu nümayişinə çevrildi.