07-10 may 2026-cı il tarixlərində Çin Xalq Respublikasının Hançjou şəhərində “The 15th Westlake International Conference of Ultrasound in Medicine and Biology 2026 (WICUMB)” beynəlxalq konfransı keçirildi. Ultrasəs və başqa müasir tibbi görüntüləmə metodlarına həsr olunmuş bu mötəbər beynəlxalq elmi tədbirdə dünyanın müxtəlif ölkələrindən gəlmiş alim və mütəxəssislər iştirak etmiş, ultrasəs diaqnostikası sahəsində ən son yeniliklər və müasir yanaşmalar müzakirə olunmuşdur. Konfrans beynəlxalq elmi təcrübə mübadiləsi və tibbin müxtəlif sahələri üzrə əməkdaşlığın inkişaf etdirilməsi baxımından mühüm əhəmiyyət daşımışdır. Konfrans həm də yeni nəsil görüntüləmə texnologiyalarının klinik praktikaya inteqrasiyası baxımından önəmli platforma kimi çıxış etmişdir.
Konfrans çərçivəsində elastoqrafiya, kontrast ultrasəs müayinələri, onkoloji görüntüləmə, invaziv radiologiya və süni intellekt əsaslı diaqnostik texnologiyalar üzrə elmi məruzələr təqdim olunmuşdur.
Eyni zamanda tədbirdə müxtəlif klinik halların müzakirəsi, interaktiv sessiyalar və gənc tədqiqatçılar üçün elmi proqramlar da təşkil edilmişdir. Həmin proqram çərçivəsində Ə.Əliyev adına Azərbaycan Dövlət Həkimləri Təkmilləşdirmə İnstitutunun şüa terapiyası kursu ilə şüa diaqnostikası kafedrasının rezidenti Nailə Qasımova elmi təqdimatla çıxış etmişdir. Həmçinin rerzidentimiz elmi poster təqdimatı da nümayiş etdirmişdir.
Konfransın son günü Nailə Qasımovaya “Young Investigator Forum” çərçivəsində “Diagnostic Value of Point Shear Wave Elastography, Ultramicroangiography and Multimodal Imaging in Characterization of Liver Tumors: A Prospective Study of 78 Patients” adlı elmi təqdimatına görə birinci mükafat - “First Prize (English Oral)” təqdim olunmuşdur. Bu mükafat rezidentimizə elmi təqdimatın yüksək elmi dəyərə malik olmasına görə və münsiflər heyəti tərəfindən ən yaxşı çıxışlardan biri kimi qiymətləndirilərək verilmişdir.