Ə.Əliyev adına Azərbaycan Dövlət Həkimləri Təkmilləşdirmə İnstitutunda rektor, professor Nazim Pənahovun Türkiyə Cümhuriyyətinin tanınmış ginekoloq - onkoloqu, “Türkiyə Ginekologiya və Mamalıq Dərnəyi”nin İdarə Heyətinin üzvü, professor Ateş Karateke və tanınmış ginekoloq, Ankara Medipol Universitetinin professoru, həmyerlimiz Məlahət Ataseverlə görüşü keçirilib.
Görüş zamanı professor A.Karateke və professor M.Atasevər uzun illərə dayanan tibbi təcrübələrindən, xüsusilə qadın sağlamlığı və onkoloji xəstəliklərin diaqnostikası və müalicəsi sahəsində əldə etdikləri nailiyyətlər haqqında məlumat verərək, erkən diaqnostikanın əhəmiyyəti və profilaktik tədbirlərin rolunu xüsusi olaraq vurğulayıblar.
Eyni zamanda qadınlarda uşaqlıq boynu xərçənginin profilaktikası tədbirlərinə dair materialların institutun tədris proqramlarına daxil edilməsi məsələsi ətrafında da müzakirələr aparıldı.
Görüşdə Ə.Əliyev adına ADHTİ-nin mamalıq-ginekologiya kafedrasının müdiri, professor Leyla Rzaquliyeva və beynəlxalq əlaqələr şöbəsinin müdiri Vəfa Abdullayeva da iştirak ediblər.