Səhiyyə Nazirliyi Ə.Əliyev adına ADHTİ-nin kardiologiya kafedrasında tədris prosesində müasir və innovativ yanaşmalara geniş yer verilir. Bu zaman müdavimlərə ürəyin ritm pozuntularının müalicəsində yüksək effekt verən müasir kardioneyromodulyasiya metodu əyani nümayiş etdirilir. Prosedur Ə.Əliyev adına ADHTİ-nin kardiologiya kafedrasının klinik bazası olan Bakı Sağlamlıq Mərkəzində həyata keçirilir.
Kardioneyromodulyasiya və ya kardioneyroablasiya tətbiqi zamanı ürəyə basqılayıcı təsiri olan azan sinir lifləri ürək daxilindən radiofrekans energisi vasitəsi ilə destruksiya edilir. Bu prosedur ürək ritmində azan sinir mənşəli bradikardiya və AV blokada hallarında tətbiq olunur. Problemin azan siniri ilə əlaqəli olduğu qabaqcadan xüsusi testlərlə təsdiq olunmalıdır. Əvvəllər bu xəstələrə məcburi kardiostimulyator implantasiyası tətbiq edilirdi. Bu gün isə bu prosedura sonrası xəstələr normal həyatlarına kardiostimulyatorsuz davam edə bilməkdədirlər.
Kardiologiyada bu kimi müasir və innovativ metodların müdavimlərə nümayiş etdirilməsi onların xüsusi marağına səbəb olur.