Bolqarıstanın paytaxtı Sofiya şəhərində kolorektal və qarnın ön divarı cərrahiyyəsinə həsr olunmuş beynəlxalq konfrans keçirilib. Tədbirdə İngiltərə, Misir, Almaniya, Rumıniya, Bolqarıstan, Avstriya və digər ölkələrdən dəvət olunmuş yüksəkixtisaslı mütəxəssislər iştirak edərək, sahə üzrə son yeniliklər və innovativ yanaşmaları müzakirə etdilər. Ə.Əliyev adına ADHTİ-nin ümumi və plastik cərrahiyyə kafedrasının dosenti t.e.d. Aynur Səfiyeva həmin beynəlxalq konfransda məruzəçi qismində iştirak edib. Əməkdaşımız tədbirdə “Anal çatların diaqnostikası və müalicəsində yeniliklər” mövzusunda məruzə ilə çıxış edərək müasir yanaşmalar və şəxsi klinik təcrübəsini beynəlxalq auditoriya ilə bölüşüb.
Qeyd etmək lazımdır ki, mövzu konfransa təqdimatdan öncə kafedrada müzakirə olunmuş və çıxış üçün önəmli məqamlar müəyyən edilmişdir.
Bu cür beynəlxalq elmi platformalarda aktiv iştirak, mütəxəssislərimizin beynəlxalq təcrübə mübadiləsinə imkan yaradır və səhiyyə xidmətlərinin keyfiyyətinin yüksəldilməsinə mühüm töhfə verir.