Ə.Əliyev adına Azərbaycan Dövlət Həkimləri Təkmilləşdirmə İnstitutunda "Layihə və məqalə yazmaq" mövzusunda elmi seminar keçirildi. Tədbiri giriş sözü ilə açan institutun rektoru professor Nazim Pənahov qeyd etdi ki, elmi tədqiqat işlərinin beynəlxalq standartlara uyğun olması bu günün ən vacib tələbidir və əməkdaşlarımızın impakt-faktorlu jurnallarda məqalələr nəşr etdirmələri institutumuzun beynəlxalq elmi nüfuzunun daha da yüksəlməsinə xidmət edir. Ona görə də bu gün keçirilən seminarda veriləcək məlumatlar iştirakçılar üçün çox faydalı olacaqdır.
Elmi seminarın məruzəçisi Ankara Hacettepe Universiteti Tibb Fakültəsinin professoru, "Orthopedic Surgery and Trauma" jurnalının baş redaktoru Feza Korkusuz idi. Məruzədə nüfuzlu beynəlxalq elmi bazalar olan Scopus, Web of Science və s. tərəfindən keyfiyyət və elmi dəyər meyarlarına görə qəbul edilmiş impakt-faktorlu jurnallarda məqalə nəşr etdirmək üçün onların yazılması qaydaları və qoyulan tələblər izah edildi, qarşıya çıxan problemlərin həlli yolları göstərildi.
Məruzə ətrafında aktiv müzakirələr aparıldı, professor Feza Korkusuz verilən çoxsaylı sualları cavablandırdı.