27-28 fevral 2026-cı il tarixində Bakıda Azərbaycan Respublikası Səhiyyə Nazirliyi, Azərbaycan Tibb Universiteti və Dövlət Gömrük Komitəsi Tibbi Xidmət İdarəsinin Mərkəzi Hospitalı birgə təşkilatçılığı ilə “Pediatriyada elmi irs və innovasiyalar: Hibrid dünyada uşaq olmaq” pediatriya sahəsində görkəmli alimlərin yubileyinə həsr olunmuş Beynəlxalq konqres keçirildi. Tədbirdə Azərbaycan, Türkiyə və Russiyadan olan alimlər məruzələrlə çıxış etdilər.
Açılış mərasimindən sonra konqres öz işini seksiyalarda davam etdirdi. Bu seksiyalar akademik, Əməkdar elm xadimi Adilə Əvəz qızı Namazovanı 100 illik yubileyinə, Əməkdar həkim, tibb elmləri doktoru, professor Nəsibə Ağaismayıl qızı Hüseynovanın 100 illik yubileyinə, professor Amaliya Abdulla qızı Əyyubovanın 90 illik yubileyinə, professor Surxay Novruz oğlu Musayevin 75 illik yubileyinə, Əməkdar elm xadimi, professor Nəsib Cəfər oğlu Quliyevin 75 illik yubileyinə və professor Səfixan Şamil oğlu Həsənovun 70 illik yubileyinə həsr olunmuş idi.
Əməkdar elm xadimi, professor Amaliya Əyyubovanın 90 illik yubileyinə həsr edilmiş seksiyada Ə.Əliyev adına ADHTİ-nun pediatriya kafedrasının müdiri, professor Rəqsana Məmmədova "Qida allergiyasının klinik təzahürləri", həmin kafedranın dosenti Nigar Hacıyeva "Tənəffüs yollarının infeksiyalarında rasional antibiotikoterapiya nə deməkdir" mövzusunda məruzələrlə çıxış etdilər.
Konqresin 2-ci günü professor Nəsibə Hüseynovanın 100 illik yubileyinə həsr olunmuş seksiya çərçivəsində Ə.Əliyev adına ADHTİ-nun pediatriya kafedrasının assistenti Erkin Rəhimov "Uşaqlarda xroniki qəbizliyə multidissiplinar yanaşma" mövzusunda 2 klinik hadisə təqdim etdi.