Əziz həmkarlar!
Altı il əvvəl, 8 noyabr 2020-ci il tarixində Azərbaycan xalqı 44 günlük Vətən müharibəsində tarixi Zəfər qazanaraq torpaqlarımızın işğaldan azad edilməsi ilə tariximizin ən şanlı səhifələrindən birini yazdı. 2023-cü ildə həyata keçirilən lokal xarakterli antiterror tədbirləri nəticəsində isə ölkəmizin suverenliyi bütün ərazimizdə tam bərpa olundu.
Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun qüdrəti, xalqımızın sarsılmaz birliyi və Vətənə sonsuz sevgisi tarixi Qələbəmizi təmin etdi. Bu möhtəşəm Zəfər Azərbaycan xalqının gücünü, iradəsini, əzmini və mübariz ruhunu bütün dünyaya nümayiş etdirdi.
Bu şanlı Qələbənin əldə olunmasında ölkəmizin tibb işçilərinin də əvəzsiz xidmətləri olmuşdur. Vətən müharibəsi zamanı həm ön cəbhədə, həm də arxa cəbhədə fəaliyyət göstərən həkimlərimiz böyük fədakarlıq və peşəkarlıq nümayiş etdirərək yüzlərlə yaralı hərbçimizin həyatını xilas etmişlər. Onlar müqəddəs həkimlik andına sadiq qalaraq, həyatlarını təhlükəyə atmaqdan çəkinmədən öz vəzifələrini şərəflə yerinə yetirmişlər.
Xüsusilə qeyd etmək istərdim ki, institutumuzun müdavimləri olmuş çoxsaylı həkimlərimiz döyüş bölgələrində və tibb müəssisələrində göstərdikləri qəhrəmanlıq və fədakarlıqla Qələbəmizə mühüm töhfə vermişlər. İnstitutumuzun cərrahiyyə profilli kafedralarının əməkdaşları həm bilavasitə cəbhə bölgəsində, həm də çalışdıqları tibb müəssisələrində həyata keçirdikləri mürəkkəb cərrahi əməliyyatlarla neçə-neçə hərbçimizin həyatını xilas etmişlər. Bu xidmətlər Azərbaycan səhiyyəsinin və həkimlərimizin Vətən qarşısındakı məsuliyyətinin parlaq təzahürüdür.
Bu əlamətdar gün münasibətilə hər birinizi ürəkdən təbrik edir, dövlətimizin müstəqilliyi və ərazi bütövlüyü uğrunda canlarından keçmiş şəhidlərimizə Allahdan rəhmət, qazilərimizə şəfa və möhkəm cansağlığı diləyirəm.

Ə. Əliyev adına ADHTİ-nin rektoru
professor Nazim Pənahov