Görkəmli dövlət və elm xadimi Əziz Əliyevin 130 illik yubiley tədbirləri çərçivəsində Səhiyyə Nazirliyinin Ə.Əliyev adına Azərbaycan Dövlət Həkimləri Təkmilləşdirmə İnstitutunda ixtisasartırma kurslarında iştirak edən müdavimlərin institutda fəaliyyət göstərən, görkəmli şəxsiyyətin həyat və fəaliyyətinə həsr olunmuş Xatirə Muzeyinə ziyarətləri təşkil olunur.
Ziyarətlərin əsas məqsədi müdavimləri Əziz Əliyevin Azərbaycan səhiyyəsinin, tibb elminin və tibbi təhsilin inkişafındakı misilsiz xidmətləri ilə yaxından tanış etmək, onun zəngin elmi və mənəvi irsinin gələcək nəsillərə çatdırılmasına töhfə verməkdir.
Muzeydə nümayiş etdirilən eksponatlar və fotoşəkillər vasitəsilə müdavimlər görkəmli şəxsiyyətin həyat yolu, çoxşaxəli fəaliyyəti və Azərbaycan səhiyyəsinin inkişaf tarixi haqqında ətraflı məlumat əldə edirlər. Ziyarətlər zamanı Əziz Əliyevin hazırda onun adını daşıyan Azərbaycan Dövlət Həkimləri Təkmilləşdirmə İnstitutunun rektoru vəzifəsində çalışdığı dövrə xüsusi diqqət yetirilir, institutun inkişafı, elmi-pedaqoji fəaliyyətinin təkmilləşdirilməsi və tibb kadrlarının hazırlanması istiqamətində həyata keçirdiyi mühüm işlər vurğulanır.