3–4 oktyabr 2026-cı il tarixlərində Bakı şəhərində “Sağlam Qadın – Sağlam Nəsil: Ginekologiyada Yeni Üfüqlər” adlı I Beynəlxalq Konfrans keçirilib. Tədbirdə qadın sağlamlığının qorunması, hamiləliyin aparılması, ginekoloji xəstəliklərin diaqnostika və müalicəsində müasir yanaşmalar, eləcə də klinik praktikada rast gəlinən aktual problemlərə həsr olunmuş məruzələr dinlənilmiş və müzakirələr aparılmışdır. Beynəlxalq konfrans mütəxəssislər arasında elmi bilik və klinik təcrübə mübadiləsi, aktual məsələlərin müzakirəsi və peşəkar əməkdaşlığın genişləndirilməsi baxımından mühüm platforma olmuşdur.
Konfransda Əziz Əliyev adına Azərbaycan Dövlət Həkimləri Təkmilləşdirmə İnstitutunun mamalıq və ginekologiya kafedrası əməkdaşları fəal iştirak etmişlər. Kafedranın müdiri, professor Leyla Rzaquliyeva konfransın sədri və panel moderatoru olmuş, kafedranın assistenti Günel Əfəndiyeva isə “Von Willebrand xəstəliyi və hamiləlik” mövzusunda elmi məruzə ilə çıxış etmişdir.