29 sentyabr–2 oktyabr tarixlərində Azərbaycan Respublikası Səhiyyə Nazirliyinin Ə.Əliyev adına Azərbaycan Dövlət Həkimləri Təkmilləşdirmə İnstitutunun rektoru, professor Nazim Pənahovun Almaniya Federativ Respublikasına işgüzar səfəri baş tutub. “Dentsply Sirona” şirkətinin dəvəti ilə keçirilən səfərdə instituyun rektorunu Azərbaycan Tibb Universitetinin Tədris Stomatoloji Klinikasının direktoru, t.ü.f.d. İmran Ağayev müşayiət edib. Səfərin əsas məqsədi səhiyyə və tibb təhsili sahələrində əməkdaşlıq imkanlarını müzakirə etmək, stomatologiya üzrə müasir təlim proqramlarının hazırlanması və birgə fəaliyyət istiqamətlərini müəyyənləşdirmək olub. Səfər çərçivəsində “Dentsply Sirona” şirkətinin nümayəndələri ilə keçirilən görüşlərdə stomatoloji təhsil, həkimlərin davamlı peşəkar inkişafı və müasir təlim metodlarının tətbiqi məsələləri ətrafında fikir mübadiləsi aparılıb. Şirkətlə təlim kursları çərçivəsində əməkdaşlığın genişləndirilməsi, həmçinin gələcəkdə Əziz Əliyev adına ADHTİ ilə “Dentsply Sirona Dental Education Program”ın yaradılması imkanları müzakirə olunub. Görüşlər zamanı bildirilib ki, “Dentsply Sirona” stomatoloji avadanlıqlar və tədris ləvazimatlarının istehsalı sahəsində dünyanın aparıcı şirkətlərindən biridir. Şirkət “DS Academy” platforması vasitəsilə stomatoloqlar üçün canlı seminarlar, praktiki “hands-on” tədbirlər, vebinarlar və onlayn kurslar təşkil edir. Eyni zamanda, dünyanın müxtəlif ölkələrində fəaliyyət göstərən təlim mərkəzləri vasitəsilə universitetlər, stomatoloji məktəblər və peşəkar təşkilatlarla əməkdaşlıq edir. Səfər zamanı professor Nazim Pənahov Almaniyanın nüfuzlu ali təhsil müəssisələrindən biri olan Frankfurt Universitetinin Stomatoloji Klinikasını da ziyarət edib. Ziyarət çərçivəsində klinikanın fəaliyyəti, müasir stomatoloji xidmət və tədris imkanları ilə tanışlıq keçirilib. Həmçinin klinikanın nəzdində fəaliyyət göstərən təlim mərkəzinin infrastrukturu, praktiki hazırlıq imkanları və stomatoloqların peşəkar inkişafına yönəlmiş təlim yanaşmaları barədə məlumat əldə edilib. Keçirilən görüşlər və aparılan fikir mübadiləsi Əziz Əliyev adına ADHTİ-də stomatologiya üzrə davamlı tibbi təhsilin beynəlxalq standartlara uyğun inkişaf etdirilməsi, müasir təlim imkanlarının ölkəmizdə tətbiqi və mütəxəssislərin praktiki hazırlığının gücləndirilməsi baxımından əhəmiyyətli olub. Səfərin yekunlarına əsasən, tərəflər arasında əməkdaşlığın konkret istiqamətlərinin müəyyənləşdirilməsi, təlim və təhsil proqramlarının hazırlanması, eləcə də qarşılıqlı təcrübə mübadiləsinin genişləndirilməsi üzrə müzakirələrin davam etdirilməsi nəzərdə tutulub.