14–18 sentyabr 2026-cı il tarixlərində Yunanıstanın paytaxtı Afina şəhərində European Association for Cranio-Maxillo-Facial Surgery (EACMFS) tərəfindən təşkil olunan 28-ci Beynəlxalq Konqres keçirilib. Tədbirdə Ə.Əliyev adına Azərbaycan Dövlət Həkimlərin Təkmilləşdirmə İnstitutunun stomatologiya və üz-çənə cərrahiyyəsi kafedrası elmi-tədqiqat işləri ilə təmsil olunmuşdur. Kafedranın müdiri, dosent Həsən Əsədovun elmi rəhbərliyi ilə hazırlanmış elmi işlər konqresin elmi proqramına daxil edilmiş və həm məruzə, həm də poster təqdimatı formatında nümayiş etdirilmişdir.
Kafedranın assistenti İlham Mehdiyev “Surgery-First Orthognathic Correction of Skeletal Class III in a Patient with a Completely Edentulous Maxilla: A Multidisciplinary, Prosthetically Driven Approach” mövzusunda məruzə ilə çıxış etmişdir.Təqdimatda tam dişsiz üst çənənin dental implantlar və implantüstü protezlə əvvəlcədən reabilitasiya olunduğu pasiyentdə III sinif skelet deformasiyasının ortognatik cərrahi korreksiyası ilə bağlı klinik hal təqdim edilmişdir. Müalicə multidissiplinar və protez yönümlü planlama əsasında həyata keçirilmiş, mövcud implantüstü protezin və okklüzal vəziyyətin nəzərə alınması ilə “surgery-first” ortognatik cərrahiyyə yanaşması tətbiq edilmişdir.
Təqdimatda klinik vəziyyətin qiymətləndirilməsi, müalicənin planlaşdırılması, cərrahi mərhələ və əldə olunan funksional və estetik nəticələr təqdim olunmuşdur.
Kafedranın rezidenti olmuş Günel Mustafayeva “Bimaxillary Orthognathic Correction of Severe Skeletal Class III in Moebius Syndrome: A Two-Year Follow-Up Case Report” mövzusunda məruzə ilə çıxış etmişdir.Təqdimatda xəstədə aparılmış müalicənin cərrahi planlaşdırılması, yuxarı və aşağı çənələrdə edilmiş ortognatik müdaxilələr, əldə edilmiş skelet və okklüzal nəticələr, eləcə də pasiyentin ikiillik klinik müşahidəsinin nəticələri təhlil edilmişdir.
Bundan əlavə, kafedranın əməkdaşları tərəfindən hazırlanmış “Orthognathic Correction of Skeletal Discrepancy in Acromegaly: Surgical and Functional Outcomes” adlı elmi iş konqres çərçivəsində poster təqdimatı formatında nümayiş etdirilmişdir.
Kafedranın elmi işlərinin EACMFS kimi beynəlxalq səviyyəli ixtisaslaşmış elmi tədbirin proqramında yer alması və müxtəlif təqdimat formatlarında nümayiş etdirilməsi kafedranın üz-çənə cərrahiyyəsi, ortognatik cərrahiyyə və multidissiplinar dentofasial müalicə istiqamətlərində apardığı elmi-klinik fəaliyyətin beynəlxalq elmi platformada təqdim olunmasına imkan yaratmışdır.