Ə.Əliyev adına Azərbaycan Dövlət Həkimləri Təkmilləşdirmə İnstitutunda rektor, professor Nazim Pənahov ilə Səhiyyə Nazirliyinin Tibb Müəssisələrinin Akkreditasiyası və Keyfiyyətə Nəzarət Mərkəzinin İdarə Heyətinin sədri Orxan Şükürov arasında işgüzar görüş keçirilib. Görüşdə tibb işçilərinin sertifikasiyası prosesinin təkmilləşdirilməsi, institutun tədris planına uyğun təşkil olunan ixtisasartırma və təkmilləşdirmə kurslarının akkreditasiyası, imtahan suallarının ekspertizası, eləcə də qarşılıqlı əməkdaşlığın digər istiqamətləri ətrafında geniş fikir mübadiləsi aparılıb.
Tərəflər səhiyyə sahəsində kadr hazırlığının və davamlı peşəkar inkişafın keyfiyyətinin artırılması istiqamətində əməkdaşlığın daha da genişləndirilməsinin vacibliyini vurğulayıblar.
Görüşün sonunda müzakirə olunan məsələlərin həyata keçirilməsi, qarşıda duran vəzifələrin əlaqələndirilməsi və gələcək əməkdaşlığın səmərəli təşkili məqsədilə birgə fəaliyyət planının hazırlanması barədə razılığa gəlinib.