05-08 iyul 2026-cı il tarixlərində London şəhərində Avropa İnsan Reproduksiyası və Embriologiyası Cəmiyyətinin (ESHRE) 42-ci illik konfransı keçirildi. ESHRE-nin illik konfransı reproduktiv tibb, sonsuzluğun müalicəsi, köməkçi reproduktiv texnologiyalar və embriologiya sahəsində dünyanın ən nüfuzlu elmi tədbirlərindən biridir.
Tədbirdə Ə.Əliyev adına Azərbaycan Dövlət Həkimləri Təkmilləşdirmə İnstitutunun mamalıq və ginekologiya kafedrasının əməkdaşı, t.ü.f.d. Rəxşəndə Aslanova da iştirak edib və “Preliminary Embryological and Implantation Outcomes of Progesterone versus GnRH Antagonist for LH Suppression in IVF Cycles” adlı elmi-tədqiqat işin nəticələrini beynəlxalq elmi ictimaiyyətə təqdim edib. Həmin təqdimatda ekstrakorporal mayalanma proqramlarında istifadə edilən iki fərqli yumurtalıqların stimulyasiya protokolunun reproduktiv və perinatal nəticələri müqayisəli şəkildə təhlil olunub.
Konfransda, həmçinin, Ə.Əliyev adına Azərbaycan Dövlət Həkimləri Təkmilləşdirmə İnstitutunun mamalıq və ginekologiya kafedrasının əməkdaşları professor Mehman Həmzəyev,assistent t.ü.f.d. Samirə Əkbərbəyova və assistent t.ü.f.d. Nigar Məlikqasımova da iştirak edib.
Təqdimat Ə.Əliyev adına ADHTİ-də aparılan elmi-tədqiqat fəaliyyətin beynəlxalq səviyyədə tanıdılması, ölkəmizin reproduktiv tibb sahəsində elmi potensialın nümayiş etdirilməsi baxımından xüsusi əhəmiyyət daşıyır.