27–28 iyun 2026-ci il tarixlərində Bakıda Azərbaycan Qastroenterologiya və İnvaziv Endoskopiya Cəmiyyətinin təşkilatçılığı ilə “Xəzər Görüşləri 6” beynəlxalq elmi-praktiki konqresi keçirildi. Konqres Türk Qastroenteroloji Dərnəyi, Türk Gastrointestinal Endoskopiya Dərnəyi və Türk Qaraciyər Araşdırmaları Dərnəyi ilə birlikdə gerçəkləşdi. Tədbirin əsas məqsədi qastroenterologiya sahəsində ən son elmi nailiyyətlərin Azərbaycan tibb ictimaiyyətinə çatdırılması, yerli mütəxəssislərin beynəlxalq təcrübəyə çıxış imkanlarının genişləndirilməsi və bu sahədə peşəkar əməkdaşlığın daha da möhkəmləndirilməsi olub. Təqdirəlayiq haldır ki, hər il ABŞ-da keçirilən ən nüfuzlu qastroenteroloji tədbirlərdən biri olan DDW (Digestive Disease Week) konfransından dərhal sonra, orada təqdim olunan ən mühüm mövzuların Bakı platformasında müzakirəsinə şərait yaradılmışdır. Bu isə həm elmi baxımdan çeviklik, həm də yerli mütəxəssislərimizin qlobal təcrübəyə daha sürətli inteqrasiyası baxımından müstəsna əhəmiyyət kəsb edir.
Kongresin sədri Ə.Əliyev adına Azərbaycan Dövlət Həkimləri Təkmilləşdirmə İnstitutunun terapiya kafedrasının dosent Gülüstan Babayeva olub. Müasir qastroenterologiya və invaziv endoskopiya sahəsində elmi yeniliklərin, qabaqcıl klinik təcrübələrin və innovativ müalicə metodlarının müzakirəsinə həsr olunan konqres dünyanın 9 müxtəlif ölkəsindən gəlmiş tanınmış alim və mütəxəssisləri bir araya gətirdi. Tədbirdə Latviya Səhiyyə Naziri Hossam Abu Meri, professor Fateh Aslan, professor Marcis Leya, professor K.Takoiri, professor Dmitriy Bordin və başqalarının çıxışları iştirakçılar tərəfindən böyük maraqla qarşılandı.
İki gün davam edən kongresin elmi proqramının zənginliyi, aktual mövzuların secimi, klinik hadisə təqdimatları, mövzuları təqdim edənlərin tanınmış alimlər olması iştirakçılar tərəfindən xüsusi olaraq qeyd edildi.
“Xəzər Görüşləri 6” bir daha sübut etdi ki, Azərbaycan regionda elmi dialoq və təcrübə mübadiləsi üçün mühüm mərkəzə çevrilməkdədir.