Ə.Əliyev adına Azərbaycan Dövlət Həkimləri Təkmilləşdirmə İnstitutunda elmi-tədqiqat fəaliyyətinin müasir çağırışlara uyğun inkişaf etdirilməsi, innovativ texnologiyaların tibbi praktikaya inteqrasiyası və sübuta əsaslanan yanaşmaların tətbiqi prioritet istiqamətlərdən biridir. Bu çərçivədə mamalıq və ginekologiya kafedrasında reproduktiv tibbdə süni intellekt texnologiyalarının tətbiqinə xüsusi diqqət yetirilir.
İnstitutda aparılan elmi araşdırma çərçivəsində ekstrakorporal mayalanma (EKM) proqramlarının nəticələrinin proqnozlaşdırılması məqsədilə süni intellektə əsaslanan müasir model hazırlanmışdır. Hazırlanmış bu model klinik, laborator və embrioloji göstəricilərin kompleks analizi əsasında prenatal nəticələrin proqnozlaşdırılmasına imkan verir.

Süni intellekt texnologiyalarının tətbiqi aşağıdakı imkanları təmin edir:

• EKM proqramlarında hamiləliyin baş vermə ehtimalının əvvəlcədən proqnozlaşdırılması;
• Pasiyentə məxsus fərdi risk və üstünlüklərin obyektiv qiymətləndirilməsi;
• Sonsuzluqdan əziyyət çəkən pasiyentlər üçün fərdiləşdirilmiş müalicə strategiyasının formalaşdırılması;
• Klinik qərarların elmi əsaslarla dəstəklənməsi;
• Müalicə effektivliyinin və ümumi reproduktiv nəticələrin yaxşılaşdırılması.

Hazırlanmış süni intellekt modeli müxtəlif stimulyasiya protokolları, hormonal göstəricilər, embrion keyfiyyəti və pasiyentin fərdi xüsusiyyətlərini nəzərə alaraq nəticələrin daha dəqiq qiymətləndirilməsinə imkan yaradır. Bu yanaşma EKM sahəsində standart yanaşmadan fərdi pasiyentyönümlü tibbi qərarlara keçidi təmin edir.
Ə.Əliyev adına ADHTİ-nin mamalıq və ginekologiya kafedrasında aparılan bu elmi tədqiqat reproduktiv tibbin gələcək inkişaf istiqamətlərini müəyyənləşdirməklə yanaşı, həm praktiki həkimlər, həm də rezident və müdavimlər üçün müasir, analitik və elmi əsaslı tədris mühiti formalaşdırır. Aparılan araşdırma süni intellektin klinik praktikada tətbiqinin sonsuzluğun müalicəsində nəticələrin optimallaşdırılması baxımından mühüm perspektivlər açdığını göstərir.