2024-cü ildən başlayaraq Ə.Əliyev adına Azərbaycan Dövlət Həkimləri Təkmilləşdirmə İnstitutunun pediatriya kafedrasının təqvim planına Azərbaycanda yeni “Universal-Proqressiv Patronaj Xidməti modeli”nin və “Uşaqların immunizasiyası üzrə təlimat”ın tətbiq olunmasına dair yeni tematik kurslar və təlimlər daxil edilib.
Təlimlərin keçirilməsi immunizasiya, ana və uşaqların sağlamlığının qorunmasına dair xidmətlərin keyfiyyətini artırmaq, səhiyyənin bu sahəsinin əhəmiyyətli dərəcədə təkmilləşdirilməsinə dəstək olmaqdır. Bu kurslarda praktiki məşğələlər xüsusi yer alır. Həmin məşğələlərdə müdavimlərə əyani vasitələrlə (bələdçi, uşaq inkişafını qiymətləndirmə aləti, maneken, inyeksiya alətləri və s.) immunizasiya prosesinin incəlikləri izah edilir. Bu zaman həmin prosesin simulyatorlar üzərində icra edilməsi keçirilən məşğələləri daha maraqlı edir. Əlavə olaraq, pediatr və ana arasında risk kommunikasiyası, uşağın inkişafının sorğu vasitəsilə qiymətləndirilməsi kimi məsələlər müdavimlərin iştirakı ilə aparılan rol oyunlarında iştirakçılara daha əyani nümayiş olunur. Bu zaman verilən şərh və rəylərə xüsusi önəm verilir.
Bu şəkildə kursların həyata keçirilməsi mövzunun daha aydın, yadda qalan və maraqlı olmasına kömək edir və müdavimlərin razılığına səbəb olur.