Ə.Əliyev adına Azərbaycan Dövlət Həkimləri Təkmilləşdirmə İnstitutunda yüksəkixtisaslı mütəxəssislərin hazırlanması üçün innovasion texnologiyaların tətbiq edilməsi və onların verdiyi imkanlardan maksimum yararlanaraq müdavimlərin praktiki bacarıqlarının artırılmasina xüsusi önəm verilir. Bir çox kafedralar kimi institutun ortodontiya kafedrasında da tədris prosesində müasir texnologiyalardan istifadə edilir. Beləki, kafedranın klinik bazası olan «Ortho-1» klinikasında Avstriya istehsalı olan müasir «CADIAX® 4» kondiloqraf sisteminin tətbiq olunması tədrisin müasir standartlara cavab verməsinə köməklik edir.
Bu yüksək dəqiqlikli texnologiya aşağı çənənin hərəkətlərini obyektiv şəkildə qeydə alaraq gicgah-çənə oynağının (TMJ) funksional pozuntularının erkən diaqnostikasına və müalicənin düzgün planlaşdırılmasına imkan yaradır.

Kondiloqrafiya vasitəsilə aşağıdakı imkanlar əldə olunur:
• aşağı çənənin hərəkətlərində funksional pozuntuların aşkarlanması;
• çeynəmə əzələləri və TMJ səviyyəsində əzələ-oynaq disfunksiyasının müəyyən edilməsi;
• aşkar olunmuş patologiyanın pasiyentə vizual şəkildə nümayiş etdirilməsi;
• ortodontik və qnatoloji müalicənin elmi əsaslarla planlaşdırılması;
• alınan nəticələrin müdavim və rezidentlərə nümayiş etdirilməsi.

«CADIAX® 4» sistemi vasitəsilə aşağı çənə hərəkətlərinin pozuntuları,hərəkətlərin məhdudlaşması və asimmetriyası, koordinasiyanın pozulması, eləcə də TMJ nahiyəsində funksional diskomfort və gərginlik hissinin aşkar edıiməsi mümkündür.
Ortodontiya kafedrasında «CADIAX® 4» sisteminin mövcudluğu diaqnostika və müalicə prosesində müasir, elmi əsaslandırılmış və klinik yönümlü yanaşmanın tətbiq olunmasına imkan yaratmışdır.Sistem pasiyentlər üçün şəffaf diaqnostika, rezident və müdavimlər üçün isə müasir, praktik və elmi əsaslı tədris mühiti təmin edir.