Ə.Əliyev adına Azərbaycan Dövlət Həkimləri Təkmilləşdirmə İnstitutunun 2025-2026-cı tədris ili üçün hazırlanan təqvim planında bütün kafedralarda Təməl Həyat Dəstəyi (BLS-Basic Life Support) kursunun keçirilməsi nəzərdə tutulmuşdur. Buna əsasən kafedralarda öncədən hazırlanmış cədvələ əsasən müdavimlərə 1 günlük BLS təlimi keçirilir. Həmin kurslarda standart alqoritmlərə uyğun böyüklər, uşaq və körpələrdə aparılan ürək-tənəffüs canlandırılması tədbirləri və AED istifadə prinsiplərinin düzgün tətbiqinə dair, videolardan istifadə etməklə, geniş məlumatlar təqdim edilir və manekenlər üzərində əyani nümayiş olunur. Kursun sonunda praktiki məşğələlərdə müdavimlərə manekenlər üzərində sərbəst işləmək imkanı da yaradılır.
2025-ci ilin sentyabr-dekabr aylarında öncədən təlimatlandırılmış institutun əməkdaşları (pediatriya kafedrasının dosenti Mətanət Qaraxanova, nevrologiya və klinik neyrofiziologiya kafedrasının assistenti Mehriban Məmmədova, dermatovenerologiya kafedrasının assistenti Mədinə İsmayılova, yoluxucu xəstəliklər kafedrasının assistenti Aytən Nəcəfova, stomatologiya və üz-çənə cərrahiyyəsi kafedrasının baş laborantı Şəfa İbadullayeva) tərəfindən aparılan kurslarda 2354 nəfər müdavim iştirak etmişdir. Hər təlimin sonunda müdavimlər əldə etdikləri bacarıqlara görə öz minnətdarlıqlarını bildirmişlər.
Yeni 2026-cı ildə də bu təcrübənin davam etdirilməsi nəzərdə tutulur.