Azərbaycan Respublikası Səhiyyə Nazirliyi, Azərbaycan Milli Elmlər Akademiyası və Akademik M.A.Topçubaşov adına Elmi Cərrahiyyə Mərkəzinin birgə təşkilatçılığı ilə sentyabrın 24-də görkəmli cərrah-alim, dövlət və ictimai xadim Mustafa bəy Topçubaşovun 130 illiyinə həsr olunmuş beynəlxalq elmi-praktiki konfrans keçirilmişdir. Konfransda Azərbaycan Respublikası Prezidenti Aparatının Humanitar siyasət, diaspora, multikulturalizm və dini məsələlər şöbəsinin müdiri Fərəh Əliyeva, Səhiyyə Nazirliyi, Azərbaycan Milli Elmlər Akademiyasının rəhbər şəxsləri, həmçinin Azərbaycan, Türkiyə və Gürcüstanın tanınmış alimləri iştirak ediblər. Tədbirdə Əziz Əliyev adına Azərbaycan Dövlət Həkimləri Təkmilləşdirmə İnstitutunun rektoru professor Nazim Pənahovun rəhbərlik etdiyi nümayəndə heyəti də iştirak etmişdir.
Tədbirin rəsmi açılış mərasimində çıxış edən səhiyyə naziri Teymur Musayev, AMEA-nın prezidenti İsa Həbibbəyli, M.A.Topçubaşov adına Elmi Cərrahiyyə Mərkəzinin direktoru Rauf Ağayev, Avrasiya Cərrah və Qastroenteroloqlar Assosiasiyasının sədri Yasemin Balaban akademikin dünya və Azərbaycan tibb elminin inkişafında oynadığı mühüm roldan danışdılar. Qeyd olundu ki, onun cərrahiyyə elminə gətirdiyi yeniliklər bu gün də aktualdır və Mustafa bəy Topçubaşov Azərbaycan səhiyyəsinin və xüsusən də cərrahiyyəsinin formalaşmasında əvəzsiz rol oynayıbdır. Akademikin ömür yolu bu gün cərrahiyyə elmində çalışan gənc nəsil üçün böyük alimlik və insanlıq məktəbidir.
Alimin oğlu, Mərkəzi Klinikanın baş direktorunun müavini Ceyhun Topçubaşov çıxış edərək, atasının xatirəsinə göstərilən ehtirama görə dövlətimizin başçısına, həmçinin tədbirin təşkilatçılarına və iştirakçılarına öz minnətdarlığını bildirdi.
Akademik Mustafa bəy Topçubaşova həsr edilmiş sənədli film nümayiş olunduqdan sonra Beynəlxalq elmi-praktik konfrans öz işini panel sessiyalarla davam etdirdi.