Tibb və sağlamlıq təhsil proqramlarının, müasir yanaşmalara uyğun, sistemli şəkildə hazırlanması və yenilənməsinə daim ehtiyac duyulur. Ona görə də tibb təhsili verən müəssisələrin təlimçilərinin də təkmilləşdirilməsi mütəmadi olmalıdır. Bu məqsədlə 2024-cü ildən Azərbaycanda “Tibb tədrisçilərin inkişafı proqramı” çərçivəsində Ə.Əliyev adına ADHTİ-nun səhiyyənin təşkili və menecmenti kafedrasında “Tibb elmlərinin tədrisi” adlı kurs həyata keçirilir.
Növbəti belə kurs Naxcıvan Muxtar Respublikası Səhiyyə Nazirliyinin müraciəti əsasında Naxçıvan Sağlamlıq Mərkəzinin əməkdaşları üçün 30.06-09.07.2025-ci il tarixində keçirilmişdir. Kursda 12 nəfər tibb elmlərini tədrisi edən müxtəlif ixtisaslı həkimlər iştirak etmişlər.
Keçirilən kursda iştirakçılara tibbi tədris prosesində istifadə edilən müasir üsul və yanaşmalar, tədris planlarının hazırlanması və istifadə edilən vəsaitlər barədə geniş məlumatlar təqdim edilmişdir. Bununla yanaşı iştirakçılar təlim mövzularına dair əldə etdikləri bilik və bacarıqları praktiki məşğələlərdə nümayiş etdirmişlər.Təlimin son iki günü iştirakçıların tədris planlarının hazırlanmasına həsr edilmişdir. Hər bir iştirakçı üçün, təqdim etdiyi plana uyğun, həyata keçirdiyi dərsin 15 dəqiqəlik videoçəkilişi təşkil edilmişdir. Kursun son günündə bu videoçəkilişlər nümayiş olunmuş, təlimçilərin və iştirakçıların rəylər və tövsiyələri səsləndirilmişdir.
Sonda iştirakçılara kursu keçdikləri üçün şahadətnamələr təqdim edilmişdir.