14–15 iyun 2025-ci il tarixlərində Azərbaycan Qastroenterologiya və İnvaziv Endoskopiya Cəmiyyətinin təşkilatçılığı ilə mərhum professor İsmayıl Teymur oğlu Abbasovun xatirəsinə həsr olunmuş “Xəzər Görüşləri 5” beynəlxalq elmi-praktik konfransı baş tutmuşdur. Tədbirdə Türkiyə, Avropa və ABŞ da daxil olmaqla 9 müxtəlif ölkədən tanınmış alim və mütəxəssislər iştirak etmişlər. Konfransın əsas məqsədi dünya qastroenterologiyasındakı ən son yenilikləri yerli həkimlərlə paylaşmaq və müasir trendləri müzakirə etmək üçün innovativ elmi mühit formalaşdırmaqdan ibarət olmuşdur. Konfrans Ə.Əliyev adına Azərbaycan Dövlət Həkimləri Təkmilləşdirmə İnstitutunun terapiya kafedrasının dosenti Babayeva Gülüstan Həmid qızının sədrliyi ilə keçmişdir.
Bu ilki tədbir hər il ABŞ-da keçirilən ən nüfuzlu qastroenteroloji tədbirlərdən biri olan DDW (Digestive Disease Week) konfransından dərhal sonra keçirilmiş və orada təqdim olunan ən mühüm mövzuların Bakı platformasında müzakirəsinə şərait yaratmışdır. Bu isə həm elmi baxımdan çeviklik, həm də yerli mütəxəssislərimizin qlobal təcrübəyə daha sürətli inteqrasiyası baxımından müstəsna əhəmiyyət kəsb edir.
Konfransın birinci günündə hepatobiliar xəstəliklərin diaqnostika və menecmenti ilə yanaşı keçirilmiş mürəkkəb klinik təhlillər paneli böyük maraqa səbəb olmuşdur. Həmin günün elmi proqramındakı daha bir panel- “Professorla söhbət” (Prof. Dr. Maria Livzan, Prof. Dr. Dmitriy Bordin) geniş müzakirə və interaktivliyi ilə yaddaşlarda qalmışdır.
Konfransın ikinci günü isə mədəaltı vəzin xəstəlikləri ilə yanaşı kapsul endoskopiyasını əhatə etmişdir.
Konfransda dəvət olunmuş yüksək ixtisaslı spikerlər ilə yanaşı terapiya kafedrasının doktorantları Rəşad Həsənov, Günay Əsədova, Emin Məmmədov da çıxış etmişlər.
“Xəzər Görüşləri 5” bir daha sübut etdi ki, Azərbaycan regionda elmi dialoq və təcrübə mübadiləsi üçün mühüm mərkəzə çevrilməkdədir.