31 may 2025-ci il tarixində İ.M.Seçenov adına Birinci Moskva Dövlət Tibb Universitetinin Bakı filialının Tədris-Simulyasiya və Akkreditasiya şöbəsi tərəfindən "Mama-ginekologiyada kollaps vəziyyətlər" mövzusunda təlim keçirilmişdir. Tədbirə həkimlər, rezidentlər və kiçik tibb işçiləri qoşulmuşlar. Təlimdə Ə.Əliyev adına Azərbaycan Dövlət Həkimləri Təkmilləşdirmə İnstitutunun mamalıq və ginekologiya kafedrasının əməkdaşları dosent Reyhanə Hacıyeva və assistent Nurtən Abdullayeva ekspert qismində iştirak etmişlər.
Təlim zamanı həkim mama-ginekoloqun praktikasında kollaps vəziyyətinin yaranma səbəbləri, təsnifatı, patogenezi, əlamətləri, diaqnostikası və müalicəsi haqqında ətraflı məlumat verilmişdir. Hamiləlik və erkən doğum sonrası dövrdə kollaps keçirmiş xəstələrin vəziyyətinin proqnozu haqqında müzakirələr aparılmış, profilaktik tədbirlərin önəmliyi haqqında danışılmışdır.
Tədbirin praktik hissəsində müxtəlif klinik hallar təhlil edilmişdir. Bu zaman simulyantlara qabaqcadan yüklənmiş proqramlar əsasında dinləyicilərin mövzunu hansı səviyyədə qavradıqları aydınlaşdırılmış və belə vəziyyətlər zamanı göstəriləcək yardım metodikaları əyani şəkildə nümayiş etdirilmişdir.