17-19 may 2025-ci il tarixlərində Bakıda “4-cü Azərbaycan-Türkiyə Pediatriya Günləri” adlı elmi-praktik konfrans keçirildi. Tədbir TƏBİB, Azərbaycan Tibb Universiteti, Respublika Pediatriya Mərkəzi, Azərbaycan Respublikası Səhiyyə Nazirliyi və "Konora Events" şirkətinin, Türkiyənin “Pediatrik Uzmanlık Akademisi Derneği” və “Doğu Pediatri Derneği” elmi cəmiyyətlərinin birgə təşkilatçılığı ilə baş tutdu.
Konfransın əsas məqsədi pediatriya və ona yaxın ixtisas sahələrində əldə edilən yeni nailiyyətlərin müzakirəsi, xüsusilə gənc həkimlərin elmi-praktik biliklərinin artırılması və təcrübə mübadiləsinin təşviq olunması idi.
Elmi proqram çərçivəsində pediatriyanın müxtəlif sahələrini – uşaq endokrinologiyası, otorinolarinqologiya, respirator xəstəliklər, uşaq revmatologiyası, psixiatriya, nevrologiya, neonatologiya və digər aktual mövzuları əhatə edən debat panelləri və təqdimatlar keçirilmişdir.
Konfransdan öncə təşkil olunan 3 tətbiqi kurs isə gənc mütəxəssislərin praktik bacarıqlarını inkişaf etdirmək baxımından xüsusi əhəmiyyət daşımışdır.
Tədbirdə Türkiyənin aparıcı universitetlərinin nümayəndələri də daxil olmaqla, ümumilikdə 8 moderator və 17 məruzəçi yerli mütəxəssislərlə öz bilik və təcrübələrini bölüşdülər. Ə.Əliyev adına Azərbaycan Dövlət Həkimləri Təkmilləşdirmə İnstitutunun pediatriya kafedrasının müdiri professor Rəqsanə Məmmədova 1-ci panelin moderatoru olmuşdur. Kafedranın dosentləri M.Qaraxanova və N.Hacıyeva konfransda iştirak etmişlər.
Konfrans həmçinin müxtəlif ölkələrdən gəlmiş iştirakçılarla əlaqələrin qurulmasına, gələcəkdə ixtisasartırma kursları və beynəlxalq elmi tədbirlərdə iştirak imkanlarının genişlənməsinə zəmin yaratdı.