16 mart 2025-ci il tarixində Bakıda «OrthoTalk-2» Azərbaycan Peşəkar Ortodontlar Cəmiyyətinin (APOC) növbəti iclası keçirilmişdir.
İclasda APOC-un prezidenti, Ə.Əliyev adına ADHTİ-nin ortodontiya kafedrasının müdiri t.e.d. Z.V.Qasımova və APOC-un vitse-prezidenti İ.R.Süleymanov çıxış edərək sertifikat imtahanlarının keçirilməsi ilə bağlı keçid dövrünün aktual problemlərini, ortodontik müalicə mərhələlərində sənədləşdirmə məsələlərini iştirakçıların nəzərinə çatdırdılar. Bundan əlavə, Rusiya, Belarus və Türkiyənin ortodontik müalicə protokollarını əsas götürərək Azərbaycan Respublikası üçün eyni protokolların hazırlanmasının və təsdiq edilməsinin zəruriliyi barədə danışdılar.
Tədbirdə Ə.Əliyev adına ADHTİ-nin ortodontiya kafedrasının rezidentləri Əbdürəhmanova Nərmin, Seyfullayeva Sura, İsmayıllı Nərmin, Golshani Reza, Xəlilli Səma, Mohammadianfard Mahin ortodontiyanın aktual problemlərinə həsr olunmuş elmi-praktiki məruzələrlə çıxış etdilər.Bu məruzələr «ORTHO-1» ortodontik klinikasının bazasında ortodontiya kafedrasının 11000-dən çox olan materiallarından istifadə etməklə hazırlanmışdı. Ə.Əliyev adına ADHTİ-nin ortodontiya kafedrasının rezidentləri müxtəlif diş-çənə anomaliyalarının yayılmasının statistik analizlərini aparıb, praktiki həkimlərə kafedrada hazırlanmış alqoritmlər əsasında kəsici və köpək dişlərinin retensiyası olan pasiyentlərin ortodontik müalicəsinin çətinliklərini müəyyən etmək üsullarını göstərib, həmçinin ortodontik pasiyentlərin müalicəsinin bütün mərhələlərini müzakirə etməklə aparılan müalicənin nəticələrini nümayiş etdirdilər.
APOC-un üzvləriolan praktiki həkimlər müzakirələrdə fəal iştirak edib, sertifikat imtahanının keçirilməsi və ortodont sertifikatının alınması ilə əlaqədar mövcud vəziyyətlə bağlı fikirlərini bildirdilər. Ə.Əliyev adına ADHTİ və ATU-da ortodontiya kafedraları yarandıqdan sonra yalnız 3 illik rezidenturanı bitirmiş həkimlər ortodont həkim kimi işləyə və hər 5 ildən bir ortodontiya ixtisası üzrə sertifikasiya imtahanlarını verə biləcəklər. Ona görə də 2022-ci ilə qədər institutu bitirən və APOC-un üzvü olan praktiki həkimlər ortodontiya üzrə sertifikatlaşdırmaya şərait yaratmaq üçün müvafiq orqanlara kollektiv müraciət məktubu tərtib etmək qərarına gəldilər.
«OrthoTalk» kimi tədbirlərin mütəmadi olaraq keçirilməsi və praktiki həkimlərin Ə.Əliyev adına ADHTİ-nin ortodontiya kafedrasında ixtisasartırma üzrə modul kurslarına qatılması onların təcrübə və bilik səviyyəsini artırır. Nəticədə bütün dünyada qəbul olunduğu kimi Azərbaycanda da diş-çənə anomaliyaları olan pasiyentlərə ortodontiya üzrə rezidentura təhsilini tamamlamış və sertifikasiya imtahanından keçmiş ixtisaslı ortodontların yüksək səviyyədə xidmət göstərməsinə şərait yaradılır.