25 noyabr 2025-ci il tarixində Səhiyyə Nazirliyi Ə.Əliyev adına Azərbaycan Dövlət Həkimləri Təkmilləşdirmə institutun rektoru professor Nazim Pənahovun başçılığı ilə nümayəndə heyəti Azərbaycan İdman Akademiyasında rəsmi görüş keçirib. Görüş zamanı akademiyanın rektoru Fuad Hacıyev ali təhsil ocağı ilə tanışlıq ekskursiyası çərçivəsində qurumun tarixi və nailiyyətləri barədə ətraflı məlumat vermiş, akademiyanın nəzdindəki İdman Tibbi Tədqiqatlar Laboratoriyasının son illərdəki uğurlu fəaliyyətindən, bu sahədə geniş təcrübələrindən bəhs edib. Sonra akademiyanın böyük akt zalında Azərbaycan İdman Akademiyasının missiyasından bəhs edilən film nümayiş etdirilib.
Hər iki ali təhsil müəssisələrinin nümayəndə heyətlərinin iştirakı ilə davam etdirilən görüşdə AİA-nın rektoru Fuad Hacıyev tərəfindən qarşılıqlı əməkdaşlıq və birgə həyata keçirilə biləcək proqramlar müzakirə edilib. Səhiyyə Nazirliyi Ə.Əliyev ad. ADHTİ-nin rektoru professor Nazim Pənahov rəhbərlik etdiyi qurumun təcrübə və imkanlarını qeyd edərək qarşılıqlı əməkdaşlığın hər iki təhsil ocağı üçün faydalı olacağını bildirib. Yekunda Azərbaycan İdman Akademiyası və Səhiyyə Nazirliyi Ə.Əliyev adına Azərbaycan Dövlət Həkimləri Təkmilləşdirmə İnstitutu arasında Əməkdaşlıq Haqqında Memorandum imzalanıb.