2025-ci ilin ölkəmizdə “Konstitusiya və Suverenlik İli” kimi elan olunması uşaqların hüquqlarının qorunması baxımından xüsusi əhəmiyyət daşıyır. Uşaq hüquqlarının qorunması və təşviqi Azərbaycan Respublikasının İnsan Hüquqları üzrə Müvəkkilinin (Ombudsmanın) fəaliyyətinin əsas istiqamətlərindən biridir və bu sahədə ardıcıl tədbirlər həyata keçirilir.
Ənənəvi olaraq Uşaq Hüquqları Konvensiyasının qəbul edilməsinin ildönümü ərəfəsində Ombudsman tərəfindən hər il 20 oktyabr - 20 noyabr tarixləri aralığı ölkədə “Uşaq Hüquqları Aylığı” elan edilir. Bununla bağlı ölkədə silsilə maarifləndirici tədbirlər təşkil olunur.
Bu ilki aylıq çərçivəsində Ə.Əliyev adına Azərbaycan Dövlət Həkimləri Təkmilləşdirmə İnstitutun pediatriya kafedrasında keçirilən kurslarda bu mövzuya dair seminarlar təşkil olundu. Bununla yanaşı Bakıda təşkil edilən tədbirlərdə kafedranın dosenti Mətanət Qaraxanova BMT-nin “Uşaq hüquqları haqqında Konvensiya”sında yer alan uşaqların sağlamlıq, müdafiə, inkişaf və iştirak etmək hüquqlarının olmasına dair təqdimatla çıxış etdi. Öz çıxışlarında M.Qaraxanova tibb işçilərini uşaqlara göstərilən xidmətlər zamanı onların hüquqlarının qorunmasında fəal iştirak etməyə çağırmışdır.