Ümumdünya Diabetlə Mübarizə Günü - 1991-ci ildən etibarən Ümumdünya Səhiyyə Təşkilatı və Beynəlxalq Diabet Federasiyasının təşəbbüsü ilə hər il noyabrın 14-ü qeyd olunur. Bu günün qeyd olunmasında məqsəd diabetlə bağlı qlobal məlumatlılığın artırılması və bu xəstəliyin inkişafının qarşısını almağın yollarını axtarmaqdan ibarətdir. Həmin gün respublikamızda da qeyd olunur.
Bu ilki Ümumdünya Diabetlə Mübarizə Günü 14 noyabr 2025-ci il tarixində Azərbaycan Respublikası Endokrinologiya, Diabetologiya və Terapevtik Təlimat Assosiasiyası, Respublika Endokrinoloji Mərkəzi, Azərbaycan Endokrinoloqlar Elmi Cəmiyyəti və Azərbaycan Diabet Cəmiyyətinin birgə təşkilatçılığı ilə keçirilmiş konfransda qeyd edildi.
Konfransın açılış mərasimində Azərbaycan Respublikası Endokrinologiya, Diabetologiya və Terapevtik Təlimat Assosiasiyasının sədri, Ə.Əliyev adına ADHTİ-nin terapiya kafedrasının müdiri professor Valeh Mirzəzadə, Respublika Endokrinoloji Mərkəzinin direktor vəzifəsini icra edən t.ü.f.d. Kəmalə Ağayeva, Azərbaycan Diabet Cəmiyyətinin sədri, Ə.Əliyev adına ADHTİ-nin terapiya kafedrasının əməkdaşı t.ü.f.d. Aygün Hüseynova çıxış etdilər. Bundan sonra professor V.Mirzəzadə şəkərli diabet və komorbid vəziyyətlərin idarə edilməsinə dair məruzəsində bu sahədə əldə edilmiş yeniliklərlə iştirakçıları tanış etdi. Konfransda İzmir Dokuz Eylül Universitetinin daxili xəstəliklər, endokrinologiya və metabolik xəstəliklər kafedrasının professoru Tevfik Demir də “Qlükoza sirrsiz: davamlı nəzarətin yeni dövrü” adlı məruzə ilə çıxış etdi. Məruzələr maraqla dinlənildi və mövzular ətrafında fəal müzakirələr aparıldı.