Tibb və sağlamlıq təhsil proqramlarının, müasir yanaşmalara uyğun, sistemli şəkildə hazırlanması və yenilənməsinə daim ehtiyac duyulur. Ona görə də tibb təhsili verən müəssisələrin təlimçilərinin də təkmilləşdirilməsi mütəmadi olmalıdır. Bu məqsədlə 2024-cü ildən Azərbaycanda “Tibb tədrisçilərin inkişafı proqramı” çərçivəsində Ə.Əliyev adına ADHTİ-nun pedaqogika, psixologiya və səhiyyənin təşkili və menecmenti kafedrasında “Tibb elmlərinin tədrisi” adlı kurs həyata keçirilir. Növbəti kurs 03.03.2025-14.03.2025-ci il tarixində keçirilmişdir. 10 gün davam edən kursda institutun nefrologiya, hematologiya, anesteziologiya və reanimatologiya, stomatologiya və üz-çənə cərrahiyyəsi və oftalmologiya kafedralarınnın 5 nəfər, Gəncə Tibb Kolecinin 4 nəfər əməkdaşı iştirak etmişdir.
Keçirilən kursda iştirakçılara tibbi tədris prosesində istifadə edilən müasir üsul və yanaşmalar, tədris planlarının hazırlanması və istifadə edilən vəsaitlər barədə geniş məlumatlar təqdim edilmişdir. Bununla yanaşı iştirakçılar təlim mövzularına dair əldə etdikləri bilik və bacarıqları praktiki məşğələlərdə nümayiş etdirmişlər.
Təlimin son iki günü iştirakçıların tədris planlarının hazırlanmasına həsr edilmişdir. Hər bir iştirakçı üçün, təqdim etdiyi plana uyğun, həyata keçirdiyi dərsin 15 dəqiqəlik videoçəkilişi təşkil edilmişdir. Kursun son günündə bu videoçəkilişlər nümayiş olunmuş, rəylər səsləndirilmişdir.
Qeyd etmək lazımdır ki, bu kursun davamlı şəkildə keçirilməsi və kursda Azərbaycanın şəhər və rayonlarından tibb tədrisçilərinin daha yaxından iştirakı nəzərdə tutulur.