Beynəlxalq Qızıl Xaç və Qızıl Aypara Cəmiyyətləri Federasiyasının QİÇS, Vərəm, Hepatit və Psixoaktiv Maddələrdən sui-istifadə Avropa Şəbəkəsi (ERNA -European Red Cross and Red Crescent on AİDS, TB, Hepatitis and Substance Abuse) 1997-ci ildən fəaliyyət göstərir. Hər il Şəbəkənin ümumi yığıncağında Federasiyaya üzv olan ölkələrdə həyata keçirilən QİÇS, Vərəm, Hepatit və Narkotiklərlə mübarizə ilə bağlı fəaliyyətlər barədə məlumatlar təqdim edilir, ölkələrarası təcrübə mübadiləsi və yeni perspektivlərə yol açılır.
03-05 noyabr 2025-ci il tarixində “İcma-sağlamlıq reaksiyalarının gücləndirilməsi: HİV/ QİÇS, Hepatit, Vərəm və Psixoaktiv Maddə asılılığı ilə mübarizə üçün birləşdi” adı altında Şəbəkənin növbəti XXII Baş Assambleyası Yunanıstanın paytaxtı Afina şəhərində keçirildi. Assambleya Yunanıstanın Qırmızı Xaç Cəmiyyəti tərəfindən Yunanıstan Səhiyyə Nazirliyi və Afina şəhəri Səhiyyə Nazirliyi ilə əməkdaşlıqda təşkil edildi. Keçirilən tədbirdə 14 ölkənin Milli Cəmiyyətlərinin nümayəndələrilə yanaşı Afina şəhərinin səhiyyə naziri, sosial və digər dövlət qurumlarının nümayəndələri də iştirak edirdilər. Assambleyada QİÇS, vərəm və psixoaktiv maddələrdən sui-istifadə mövzularına həsr edilən 3 panel təşkil olundu. Azərbaycanda vərəm sahəsində həyata keçirilən fəaliyyətlər müvafiq paneldə təqdim edildi. Şəbəkənin 2026-2035 illər üçün yeni strategiyası qruplarda müzakirə olundu.
Yığıncağın sonunda gələcəkdə hər bir ölkədə bu sahələrin inkişafına dövlət və qeyri-dövlət təşkilatlarının birgə fəaliyyətlərinin daha geniş həyata keçirilməsi yolları haqqında müzakirələr aparıldı və təkliflər səsləndi.
Ə.Əliyev adına Azərbaycan Dövlət Həkimləri Təkmilləşdirmə İnstitutunun pediatriya kafedrasının dosenti Mətanət Qaraxanova Azərbaycan Qızıl Aypara Cəmiyyətinin könüllüsü olaraq ERNA-nın XXII Baş Assambleyasında iştirak edərək aparılan müzakirələrdə fəal olmuşdur.