31 oktyabr 2025-ci il tarixində Azərbaycan Respublikası Səhiyyə Nazirliyi, akademik Z.Əliyeva adına Milli Oftalmologiya Mərkəzi və Azərbaycan Oftalmoloqlar Cəmiyyətinin birgə təşkilatçılığı ilə Gəncə şəhərində Oftalmoloqların XIV Regional Konfransı keçirildi. Artıq ənənəyə çevrilən və hər il ölkənin müxtəlif bölgələrində təşkil olunan bu tədbir oftalmoloji xidmətlərin regionlarda inkişafı, həkimlər arasında elmi-praktik əməkdaşlığın genişləndirilməsi, o cümlədən müasir tibbi texnologiyaların tətbiqinin təşviqi məqsədi daşıyır.
Konrfansda Ə.Əliyev adına ADHTİ-nin oftalmologiya kafedrasının əməkdaşlarından t.e.d. Yazgül Abdıyeva və kafedranın baş laborantı, akademik Z.Əliyeva adına Milli Oftalmologiya Mərkəzinin direktor müavini Ceyhun Nəzərli məruzələrlə çıxış ermişlər. “Azərbaycan Oftalmoloqlar Cəmiyyətinin dünəni və bu günü” adlı məruzə ilə çıxış edən t.e.d. Y.Abdıyeva Azərbaycan oftalmologiyasının tarixindən danışdı. “Akademik Z.Əliyeva adına Milli Oftalmologiya Mərkəzinin səyyar klinikasının 20 illik təcrübəsi” adlı məruzə ilə çıxış edən C.Nəzərli Mərkəzin səyyar klinikasının 20 illik fəaliyyəti barədə məlumat verdi. O, Prezident İlham Əliyevin sərəncamı ilə həyata keçirilən “Böyük Qayıdış” proqramına qoşularaq işğaldan azad edilmiş torpaqlarımızda səyyar klinika tərəfindən təşkil olunan humanitar tibbi aksiyalardan bəhs etdi.
Eyni zamanda t.e.d. Yazgül Abdıyeva və Ceyhun Nəzərli konfransın içlaslarında sədrlik də etmişlər. Ə.Əliyev adına ADHTİ-nin oftalmologiya kafedrasının o biri əməkdaşları bu konfransın təşkilində yaxından iştirak etmiş, iclaslarda fəal olmuşlar.