Azərbaycan səhiyyəsinə ağır itki üz vermişdir. Azərbaycan Respublikasının əməkdar elm xadimi, tibb elmləri doktoru, professor İsrafilbəyli Solmaz Hüseyn qızı ömrünün 95-ci ilində vəfat etmişdir.
Professor S.H.İsrafilbəyli 1928-ci ildə Bakı şəhərində ziyalı ailəsində anadan olmuşdur. Azərbaycan Dövlət Tibb İnstitutunu bitirmiş, həkim kimi əmək fəaliyyətinə Xızı rayonunda başlamışdır. 1955-ci ildə Azərbaycan Dövlət Tibb İnstitutunun bazasında mamalıq və ginekologiya ixtisası üzrə aspiranturaya daxil olmuş və 1960-cı ildə "Nisbi göstərişlər əsasında aparılan Sezar kəsiyi əməliyyatı məsələsinə dair" mövzusunda namizədlik dissertasiyasını müdafiə etmişdir.
Solmaz İsrafilbəyli 1960-cı ildən Ə. Əliyev adına Azərbaycan Dövlət Həkimləri Təkmilləşdirmə İnstitutunda əvvəl assistent, 1967-ci ildən isə dosent vəzifəsində çalışmışdır. 1968-ci ildə isə ona adı çəkilən institutun mamalıq və ginekologiya kafedrasının müdiri vəzifəsi həvalə edilmişdir. O, elmi-tədqiqat işlərini davam etdirərək 1974-cü ildə "Müxtəlif yaş dövründə olan qadınlarda endemik ur xəstəliyinin yumurtalıqların funksiyasına təsiri" mövzusunda doktorluq dissertasiyası üzərindəki işini başa çatdıraraq müdafiə etmişdir. 1978-ci ildə ona professor elmi adı verilmişdir.
Solmaz xanım Ə. Əliyev adina ADHTİ-nin mamalıq və ginekologiya kafedrasına 2012-ci ilə qədər rəhbərlik etmiş və bundan sonrakı illərdə də elmi-pedaqoji fəaliyyətini davam etdirmişdir.
Professor Solmaz İsrafilbəyli 180 elmi işin, o cümlədən 3 monoqrafiyanın müəllifidir. Onun rəhbərliyi altında 13 namizədlik (tibb üzrə fəlsəfə doktorluğu) və 3 doktorluq dissertasiyası işlənilərək müdafiə edilmişdir.
Solmaz xanım uzun illər Azərbaycan Mama və Ginekoloqlarının Elmi Cəmiyyətinin sədri kimi çalışmış, 1982-1989-cu illərdə Respublika Səhiyyə Nazirliyinin baş mama-ginekoloqu vəzifəsini yerinə yetirmişdir. Professor Solmaz İsrafilbəyli 1987-ci ildə Azərbaycan elminin inkişafında xidmətlərinə görə “Əməkdar elm xadimi” fəxri adına layiq görülmüş, 2000-ci ildə "Şöhrət" ordeni ilə təltif edilmişdir.
Tanınmış alim, savadlı həkim və elm təşkilatçısı professor Solmaz Hüseyn qızı İsrafilbəylinin xatirəsi onu tanıyanların qəlbində daim yaşayacaqdır.
Allah rəhmət eləsin