Uşaq hüquqlarının beynəlxalq müdafiəsi istiqamətində mühüm aspektləri özündə birləşdirən, 1989-cu il noyabrın 20-də BMT-nin Baş Məclisi tərəfindən qəbul edilmiş “Uşaq hüquqları haqqında” Konvensiya iştirakçı dövlətlərin hər bir uşaq üçün təmin etməli olduğu universal standartları müəyyən edir. Konvensiya dünyada ən geniş şəkildə ratifikasiya olunan beynəlxalq müqavilə olmaqla uşaqların hüquqlarını qorumaq üçün qəbul edilən əsas sənəd kimi bir çox dövlətlərin bu sahədə milli qanunvericilik bazasının formalaşmasına təkan vermişdir. Azərbaycan Respublikası 1992-ci ildə BMT-nin “Uşaq hüquqları haqqında” Konvensiyasına, 2002-ci ildə isə həmin Konvensiyanın iki əlavə protokoluna qoşulmuş və 1998-ci il 19 may tarixində isə sözügedən Konvensiyanın əsas prinsiplərini özündə əks etdirən “Uşaq hüquqları haqqında” Azərbaycan Respublikasının Qanunu qəbul edilmişdir. Ölkədə uşaq hüquqlarının təmini məqsədilə müxtəlif istiqamətlərdə davamlı olaraq zəruri tədbirlər həyata keçirilməkdədir.
Uşaq hüquqlarının səmərəli müdafiəsi və təşviqinə nail olmaq məqsədilə hər il olduğu kimi, 2023-cü ildə də “Uşaq hüquqları haqqında” Konvensiyanın qəbul edilməsinin ildönümü ərəfəsində Azərbaycan Respublikasının İnsan hüquqları üzrə müvəkkili (ombudsman) tərəfindən ölkədə 20 oktyabr - 20 noyabr tarixləri “Uşaq Hüquqları Aylığı” elan edilmişdir.
Ə.Əliyev adına ADHTİ da “Uşaq Hüquqları Aylığı”na qoşularaq,”Təməl Həyat Dəstəyi” kursunda həkim və tibb bacılarına, pediatriya kafedrasında təkmilləşdirmə kurslarında iştirak edən həkim-müdavimlərə, peşə hazırlığı proqramında iştirak edənlərə “Uşaq hüquqlarının müdafiəsi” mövzusunda maarifləndirici seminarlar həyata keçirir. Seminarlarda “Uşaq hüquqlarının Konvensiyası” və bununla bağlı istifadə edilən materiallar təqdim edilir. Artıq seminarlarda 200 nəfər tibb işçisi iştirak etmişdir.
Eyni zamanda Ə.Əliyev adına ADHTİ-nin pediatriya kafedrasının tədris proqramında “Uşaq hüquqlarının qorunmasında pediatrın rolu” adlı mövzu da yer almışdır. Mütəmadi olaraq kafedrasının dosenti , UNİCEF-in “Uşaq hüquqlarının qorunması” üzrə təlimçisi dosent Mətanət Qaraxanova tərəfindən pediatrlara bu mövzuda məlumatlar təqdim edilir.
Bununla yanaşı ay ərzində RKUX-da valideynlərlə, RKX-da ginekologiya şöbəsində müalicə olunan hamilə qadınlarla maarifləndirici söhbətlərin aparılması, Naxçıvanda tibb bacıları üçün seminarın keçirilməsi də nəzərdə tutulmuşdur.