16-17 dekabr 2024-cü il tarixində Azərbaycan Respublikası Səhiyyə Nazirliyi Milli Hematologiya və Transfuziologiya Mərkəzinin 80 illik yubileyinə həsr olunmuş "Hematologiyanın aktual problemləri 2024" adlı beynəlxalq konfrans keçirilmişdir. Konfransda onkohematoloji xəstəliklər, irsi qan xəstəlikləri, innovativ müalicə metodları, qan xidmətinin təşkili və təkmilləşdirilməsi və digər mövzularda Azərbaycanla yanaşı Türkiyə, Rusiya, Fransa, Özbəkistan, Qırğızıstan, Qazaxıstan, Belarus və Gürcüstandan dəvət olunmuş ekspertlərin məruzələri dinlənilmiş, fikir mübadiləsi aparılmışdır.
Konfransın açılış mərasaimində MHTM direktoru Sərdar Əsədov, AR Səhiyyə Nazirinin müavini Nadir Zeynalov, İcbari Tibbi Sığorta üzrə Dövlət Agentliyinin sədrinin müşaviri Nelli Veysova, TƏBİB-in icraçı direktorunun müavini Anar İsrafilov, Milli Məclisin deputatı Məlahət Həsənova çıxış etmişlər. Tədbirdə Ə.Əliyev adına ADHTİ rektoru professor Nazim Qasımov, Mərkəzi Qan Bankının icraçı direktoru, müxtəlif tibb müəssisələrinin direktor və baş həkimləri iştirak etmişlər.
Konfransda Ə.Əliyev adına Azərbaycan Dövlət Həkimləri Təkmilləşdirmə İnstitutunun hematologiya kafedrasının müdiri dosent E.Qədimova "İnhibitorlu hemofiliyalı xəstələrin profilaktik müalicəsi" mövzusunda məruzə ilə çıxış etməklə yanaşı iclasın moderatoru da olmuşdur. Hematologiya kafedrasının assistenti, t.ü.f.d. M.Kazımova "Hemofiliyanın müalicəsində müasir elmi araşdırmalar, klinik nəticələr", kafedranın assistenti, t.ü.f.d. G.Əlizadə "Hemofiliyalı xəstələrdə həyat keyfiyyətinin qiymətləndirilməsi" mövzuları ilə çıxış etmişlər.