1992-ci ildən başlayaraq Ümumdünya Səhiyyə Təşkilatı, Ümumdünya Psixi Sağlamlıq Federasiyası və Beynəlxalq Psixoloqlar Assosiasiyası tərəfindən hər il 10 oktyabr Ümumdünya Psixi Sağlamlıq Günü kimi qeyd edilir. Bu gündə “İşdə psixi sağlamlıq” mövzusuna həsr edilən maarifləndirici tədbirlərin həyata keçirilməsi tövsiyə edilir. Hər il olduğu kimi bu gün Ə.Əliyev adina Azərbaycan Dövlət Həkimləri Təkmilləşdirmə İnstitutunda müdavimlər üçün Ümumdünya Psixi sağlamlıq Gününə həsr edilən seminar keçirilmişdir.İnstitutun pediatriya kafedrasının dosenti, UNİCEF və ÜST-n milli təlimçisi Mətanət Qaraxanova psixi sağlamlıq və işin bir-biri ilə sıx bağlılığı, işçilərin psixi sağlamlıq riskləri ilə üzləşməsi, stiqmanın məşğulluq üçün maneələr yaratdığı kimi məqamları vurğulayaraq geniş məlumatları təqdimatla seminar iştirakçılarına çatdırmışdır. Təqdimatda işçilərin öz psixi sağlamlıqlarının qayğısına qalmaq, stresin idarə olunması üçün müxtəlif texnikaları öyrənməyin vacib olduğu, iş yerlərində psixi sağlamlığın dəstəklənməsinin rifahın yaxşılaşmasına və məhsuldarlığın artırılmasına kömək edəcəyi xüsusi qeyd edilmişdir.