2-6 oktyabr 2024-cü il tarixində Şimali Kipr Türk Cumhuriyyətinin Girnə şəhərində Türk Daxili Xəstəliklər Uzmanlıq Dərnəyinin 26-cı Konqresi keçirilmişdir. Konqresin işində 2000 nəfərə yaxın daxili patologiya ilə məşgul olan həkimlər iştirak etmişlər. Tədbir zamanı "Şəkərli diabet və yeni antidiabetik preparatlar", "Təməl intensiv terapiya kursu", "Ultrasonoqrafiya", "Terapevtik praktikada təxitəsalınmaz vəziyyətlər" mövzularında kurslar da təşkil edilmişdir. Konqres müddətində eyni zamanda 5 salonda terapiyanın müxtəlif sahələrinə dair patologiyalar, sindromar, komorbid vəziyyətlər ətraflı müzakirə olunmuş, bu nozologiyalara kardioloq, nefroloq, revmatoloq, infeksionist, hematoloq, endokrinoloq və digər mütəxəssislərin yanaşmaları təhlil edilmiş, satellit simpoziumlar keçirilmişdir. Müzakirələr interaktiv keçmiş və dinləyicilərin böyük marağına səbəb olmuşdur. Ə.Əliyev adına Azərbaycan Dövlət Həkimləri Təkmilləşdirmə İnstitutunun terapiya kafedrasının dosenti, t.e.d. Samir Mehdiyev həmin konqresdə iştirak etmiş və "Azərbaycanda şəkərli diabet tip 2 xəstələrdə qlikemik nəzarətin kliniki-epidemioloji xüsusiyyətləri" mövzusunda məruzə ilə çıxış etmişdir.