Ümumdünya Səhiyyə Təşkilatının (ÜST) Azərbaycandakı Nümayəndəliyi içtimai səhiyyə standartlarını təkmilləşdirmək üçün diplomdan əvvəl və diplomdan sonrakı təhsil müəssisələri üçün yeni peyvənd tədris proqramı - kurikulum hazırlayaraq təqdim edir. Avropa İttifaqı tərəfindən maliyyələşdirilən “Vaksinasiyaya Dəstək” layihəsi çərçivəsində tibb işçilərinə peyvənd təcrübəsi üzrə təkmilləşdirilmiş təlimlərin keçirilməsi immunizasiya xidmətlərinin keyfiyyətini artırmaq üçün nəzərdə tutulmuşdur.
10.06.-13.06.2024-cü il tarixində Ə.Əliyev adına ADHTİ-də yeni kurikuluma dair təlimçilər üçün təlim (ToT) kursu keçirildi. ÜST-n beynəlxalq məsləhətçisi tərəfindən keçirilən bu ToT kursda institutun pediatriya, ailə təbabəti, nevrologiya və klinik neyrofiziologiya, yoluxucu xəstəliklər və mikrobiologiya kafedralarını, ATU, 2 saylı Tibb Kolleci və TƏBİB-i təmsil edən 20 nəfər müəllim iştirak etdi. Təlimin məqsədi immunizasiya ilə bağlı müasir standartlara cavab verən yeni kurikulumun tətbiqi vasitəsilə Azərbaycan səhiyyəsinin əhəmiyyətli dərəcədə təkmilləşdirilməsinə dəstək olmaqdır. Bu proqram həm də tibb təhsili verən tədrisçilərinin bacarıqlarını gücləndirir, onlara minlərlə hazırki və gələcək həkimlərə immunizasiya təcrübələri öyrətməyə imkan yaradır. Təlim, iştirakçılar tərəfindən yeni tədris ilində immunizasiyaya dair beynəlxalq və milli təcrübələrə əsaslanan mövzuların tematik kurslarda tədris edilməsini nəzərdə tutur. Bununla bağlı təlimin son günündə təlim iştirakçıları və terapiya fakültəsinin dekanı dosent, t.e.d. Zemfira Quliyeva tədris proqramlarında kurikulumun tədbiqi məsələsini müzakirə etmişlər. Müzakirədə pediatriya kafedrasının müdiri professor Rəqsanə Məmmədova da iştirak edərək, immunizasiyaya dair kurikulumun tədbiqi ilə bağlı öz fikirlərini səsləndirmişdir. Təlim iştirakçılarına müvafiq sertifikatlar təqdim olunmuşdur.