Naxçıvan Muxtar Respublikasının 100-cü, Ümummilli lider Heydər Əliyevin anadan olmasının 101-ci ildönümü münasibətilə Naxçıvan Dövlət Universitetində “Diş-çənə anomaliyalarının diaqnostika və müalicəsində müasir üsullar” adlı elmi-praktik konfrans keçirilmişdir. Konfransdan öncə qonaqlar Ümummilli lider Heydər Əliyevin abidəsini ziyarət edib, Ulu Öndərin heykəlinin önünə gül dəstələri qoyub hörmət və ehtiramlarını ifadə ediblər. Eyni zamanda tədbir iştirakçıları NDU-nun Tibb fakültəsində də olublar. Qonaqlara fakültədə fəaliyyət göstərən kitabxana, kompüter otağı, histologiya, anatomiya, fizioterapiya, patalogiya, stomatoloji simulyasiya, əzcaçılıq simulyasiya kabinələri, kimya, fiziologiya və stomatoloji texniki laboratoriyaları haqqında məlumat verilmişdir.
Konfransın açılış mərasimində əvvəlcə Ümummilli Lider Heydər Əliyevin və şəhidlərimizin əziz xatirəsi bir dəqiqəlik sükutla yad edilmiş, Azərbaycan Respublikasının Dövlət Himni səsləndirildi. Mərasimdə Ə.Əliyev adına Azərbaycan Dövlət Həkimləri Təkmilləşdirmə İnstitutunun rektoru professor Nazim Qasımov da çıxış etmiş və konfransın işinə müvəffəqiyyətlər arzulamışdır.
Səfər çərçivəsində Ə.Əliyev adına Azərbaycan Dövlət Həkimləri Təkmilləşdirmə İnstitutu ilə Naxçıvan Dövlət Universiteti arasında əməkdaşlıq memorandumu imzalanmışdır. Memorandumda hər iki təhsil müəssisəsində təhsil prosesinin beynəlxalq standartlara uyğunlaşdırılması və inkişaf etdirməsi üçün işlər həyata keçirmək, birgə elmi-tədqiqat işləri aparmaq, layihələr həyata keçirmək və təhsilin bütün sahələrində elmi mövzular haqqında məqalələr yazmaq, elmi-tədqiqat məlumatlarının və texniki materialların mübadiləsini həyata keçirmək, akademik heyətin, tələbə/rezident mübadiləsini həyata keçirmək və s. kimi maddələr öz əksini tapmışdır.
İmzalanma mərasimində çıxış edən Ə.Əliyev adına ADHTİ-nun rektoru professor Nazim Qasımov və Naxçıvan Dövlət Universitetinin rektoru dosent Elbrus İsayev qarşılıqlı əlaqələrin daha sıx olması üçün görüləcək işlərdən danışdılar.