08.10.2023-10.10.2023-cü il tarixində Bakıda VIII Tibb Təhsili üzrə Beynəlxalq Konfrans (İnternational Conference on Medical Education, ICME) keçirilmişdir. Azərbaycanda ilk dəfə keçirilən bu tədbir Azərbaycan Respublikası Səhiyyə Nazirliyi, Azərbaycan Tibb Universiteti və Pakistan İslam Respublikasının Riphah Beynəlxalq Universitetinin birgə təşkilatçılığı ilə baş tutmuşdur.
Tibb təhsilinin aktual problemlərinə həsr olunan konfransda “Kurikulum dizaynında yeniliklər”, “Tibb təhsilində qiymətləndirmə”, “Qlobal səhiyyə və tibb təhsili”, “Tibb təhsilində sağlamlıq və dayanıqlıq” mövzuları ətrafında maraqlı məruzələrlə müxtəlif ölkələrdən olan nümayəndələr çıxışlar etmişlər.
Tanınmış xarici mütəxəssislərlə yanaşı yerli mütəxəssislər də çıxış edib, tibb təhsili ilə bağlı aktual məsələlərə toxunmuşlar. Konfransda məruzəçilər tərəfindən texniki tərəqqinin müasir səviyyəsində təhsil standartlarına uyğun ixtisasartırma və kadrların yenidən hazırlanmasına, tibb təhsilinin təkmilləşdirilməsinə, dünyanın nüfuzlu ali tibb məktəbləri ilə mübadilələrin aparılmasına, onlayn təhsilin genişlənişləndirilməsi istiqamətində zəruri addımların atılmasına, davamlı tibbi təhsil sahəsində qlobal vahid akkreditasiya meyarlarının müəyyənləşdirilməsinə ehtiyac olduğu vurğulanmışdır.
Konfransda Ə.Əliyev adına ADHTİ-nun üz-çənə cərrahiyyəsi kafedrasının əməkdaşı Şəfa İbadullayeva “Tədrisdə canlanma: Ə.Əliyev adına ADHTİ-da təlimçilərin təlimi” təqdimatı ilə çıxış etmişdir. Təqdimatda institutda 2022-ci ildən başlayan ÜST Azərbaycan nümayəndəliyi, Azərbaycan Respublikası Səhiyyə Nazirliyi, İcbari Tibbi Sığorta üzrə Dövlət Agentliyi və TƏBİB-lə əməkdaşlıqda “Azərbaycanda pandemiyaya cavab tədbirləri” layihəsi çərçivəsində tibbi tədris proqramlarının beynəlxalq təcrübəyə uyğunlaşdırılması və yerli mütəxəssislərin bilik və bacarıqlarinın yenilənməsi və təkmilləşdirilməsi, bu sahədəki insan resurslarının gücləndirilməsinə dəstək olmaq məqsədi ilə aprılan kurslar haqqında geniş məlumat verilmişdir.