Ə.Əliyev adına Azərbaycan Dövlət Həkimləri Təkmilləşdirmə İnstitutunun Elmi Şurasının növbəti iclası genişlənmiş formatda institutun bütün kafedralarının professor-müəllim heyətinin iştirakı ilə keçirildi. İclasın gündəliyi aşagıdakı kimi olmuşdur:

1. 2023/2024-cü tədris ilinin təqvim planı haqqında. İnstitutun tədris prosesinin təşkili məsələləri.
2. Tibb İşçilərinin Peşə Bayramı Günü münasibətilə institut əməkdaşlarının Fəxri Fərmanla təltif olunması.

İclasın əvvəlində institutda yaranmış ənənəyə görə rektor professor N.A.Qasımov institutun tibb üzrə alimlik adları və dərəcələri almış əməkdaşlarına müvafiq diplomları təqdim edərək onları təbrik etdi.
I məsələ üzrə prorektor dosent T.H.Eyvazov çıxış edərək bildirdi ki, 2023/2024-cü tədris ilinin təqvim planıın tərtibatında bütün ixtisasların əhatə olunması, ixtisaslar üzrə 2 həftəlik tematik kursların sayının 5 olmaqla təqvim ili ərzində 4 dəfə təkrarlanması, tematik kursların yenilənməsinin minimum 20% olması, icra olunan dövlət proqramlarının yerinə yetirilməsinin nəzərə alınması, peşə hazırlığı kurslarının keçirilməsi, yalnız distant kursların planlaşdırılması və seminar /treninqlərin ancaq sifarişlə keçirilməsi prinsipləri nəzərə alınmışdır. Tədris ilində keçiriləcək 776 ixtisasartırma kursuna 9736 müdavimin qatılacağı planlaşdırılır. Bu zaman institut Elmi Şurasının 29.03.2022-ci il tarixli açıq iclasının qərarına dəyişikliklər edilərək həkim-müdavimlərin kurslarda pretest və posttest qiymətləndirilməsinin keçirilməsi və tədrisin keyfiyyətinin həkim-müdavimlər tərəfindən qiymətləndirilməsinin institutun saytında xüsusi yaradılmış bölmədə elektron formatda aparılmasına qərar verilmişdir.
Sonra prorektor bildirdi ki, Respublikadan kənar ixtisaslaşma keçmiş həkimlərin ölkəmizdə çalışması üçün onların keçdiyi tədris proqramlarının yerli tibbi tədris proqramlarına uyğunlaşdırılması lazımdır. Bu məsələni həll etmək üçün Səhiyyə Nazirliyinin göndərişi ilə həmin həkimlərin institutumuzda uyğun kursların keçməsi qərara alınmışdır. Artıq həmin kurslar başlanmışdır və müvəffəqiyyətlə davam edir. Hal-hazirda 22 ixtisas üzrə 153 müdavim hazırlıq keçir. Onların dərslərə davamiyyəti daim diqqət mərkəzindədir və mütamadi olaraq yoxlanılır. Bu yoxlamalar nəticəsində üzun müddət dərsdən yayınan 5 müdavim institutdan xaric edilmişdir. Müdavimlərin davamiyyət məsələsinə yay aylarında da xüsusi nəzarət olacaqdır.
Dosent T.H.Eyvazov bir məsələni də iştirakçıların nəzərinə çatdirdi ki, 2021-ci ildən başlayaraq, ÜST Azərbaycan nümayəndəliyi tərəfindən Azərbaycan Respublikası Səhiyyə Nazirliyi, İcbari Tibbi Sığorta üzrə Dövlət Agentliyi və TƏBİB-lə əməkdaşlıqda “Azərbaycanda Pandemiyaya cavab tədbirləri” layihəsi çərçivəsində tibbi tədris proqramlarının beynəlxalq təcrübəyə uyğunlaşdirilması və yerli mütəxəssislərinin bilik və bacarıqlarının yenilənməsi və təkmilləşdirilməsi istiqamətində tədbirlərin həyata keçirilməsi davam etməkdədir. Bu tədbirlərə ATU və Ə.Əliyev adına ADHTİ-nin müəllim heyəti üçün “Tədrisçilərin inkişafı proqramı” təlimləri də daxildir. Rektorun əmri ilə institutun bütün müəllimlərinin həmin təlimlərdə iştirak etməsi qərara alınmışdır. Müəllimlərin seçkiləri zamanı bu təlimin nəticələri xüsusi qiymətləndiriləcəkdir.
İnstitutun rektoru professor N.A.Qasımov çıxış edərək bildirdi ki, yüksəkixtisaslı mütəxəssislərin hazirlanması üçün institut əməkdaşları bütün texniki vasitələrdən və innovasion texnologiyaların verdiyi imkanlardan maksimum yararlanaraq tam həçmdə fəaliyyətlərini davam etdirməlidirlər. Keçirilən dərslərin qiymətləndirilməsi prosesi tam anonim olmaqla xüsusi yaradılmış qrup tərəfindən institutun rəsmi saytında xüsusi bölmədə aparılacaqdır.
Elmi şuranın gündəliyinin digər məsələsi üzrə rektor professor Nazim Qasımov çıxış edərək bir qrup institut əməkdaşının Tibb İşçilərinin Peşə Bayramı Günü münasibətilə Fəxri Fərmanla təltif olunmasını elan etdi. Həmin əməkdaşlara Fəxri Fərmanlar təqdim olundu.