18-19 fevral 2023-cü il tarixində Azərbaycan Respublikası Səhiyyə Nazirliyinin, Azərbaycan Tibb Universitetinin, Azərbaycan Respublikası Dövlət Gömrük Komitəsinin Tibbi Xidmət İdarəsinin elmi-təcrübi və tədris mərkəzinin, Mərkəzi Gömrük Hospitalının, Azərbaycan Kolon və Rektum Cərrahi Dərnəyinin və Türkiyə Kolon və Rektum Cərrahi Dərnəyinin birgə təşkilatçılığı ilə Ümummilli lider Heydər Əliyevin anadan olmasının 100 illiyinə həsr edilmiş “Azərbaycan-Türkiyə Kolorektal Cərrahiyyə Günləri” mövzusunda beynəlxalq elmi konqres keçirilmişdir. Konqresin rəsmi açılış hissəsi Azərbaycan Respublikasının və Türkiyə Cumhuriyyətinin dövlət himnlərinin səsləndirilməsi ilə öz işinə başladı. Rəsmi açılış hissəsində ATU-nun elmi işlər üzrə prorektoru Rauf Bəylərov, Azərbaycan Kolon və Rektum Cərrahi Dərnəyinin sədri, professor Xaləddin Musayev, Milli Məclisin Səhiyyə Komitəsinin sədr müavini, Dövlət Gömrük Komitəsinin Tibbi Xidmət İdarəsinin elmi-təcrübi və tədris mərkəzinin rəisi Rəşad Mahmudov, Türkiyə Kolon və Rektum Cərrahi Dərnəyinin sədri, professor Ayhan Kuzu, Milli Məclisin Səhiyyə Komitəsinin üzvü İlham Məmmədov və Mərkəzi Klinikanın baş həkimi Kamran Musayev çıxış etdilər.
Konqresdə 44 günlük Vətən müharibəsi şəhidlərinin və Türkiyədə baş vermiş zəlzələdə həyatını itirənlərin əziz xatirəsi bir dəqiqəlik sükutla yad edildi. Eyni zamanda Ümummilli lider Heydər Əliyevin əziz xatirəsinə həsr edilmiş video-çarx nümayiş etdirildi.
Konqresin rəsmi hissəsindən sonra elmi hissədə Azərbaycan Milli Akademiyasının müxbir üzvü, professor Nuru Bayramovun, M.A.Topçubaşov adına Elmi Cərrahiyyə Mərkəzinin direktoru, professor Rauf Ağayevin və Türkiyə Kolon və Rektum Cərrahi Dərnəyinin sədri, professor Ayhan Kuzunun moderatorluğu ilə “Yoğun bağırsağın xoşxassəli xəstəlikləri” panelində Ə.Əliyev adına Azərbaycan Dövlət Həkimləri Təkmilləşdirmə İnstitutunun terapiya kafedrasının dosenti Babayeva Gülüstan Həmid qızı “İltihabi bağırsaq xəstəliklərində gastroenteroloq-cərrah rolu və məsuliyyət bölgüsü” adlı mövzü ilə cıxış etmişdir.Cıxış böyük marağa səbəb olmuş və ətrafında diskussiya aparılmışdır.
2 gün ərzində həyata keçirilmiş konqresdə Azərbaycan və Türkiyənin qabaqcıl özəl, dövlət və universitet xəstəxanalarının mütəxəssisləri tərəfindən ümumilikdə 8 paneldə 23 məruzənin dinlənilməsi baş tutmuşdur.