“Ağız boşluğu sağlamlığı və hamiləlik” tövsiyələri tərtib olunmuşdur

28.10.2021

Qadın orqanizmində ən böyük hormonal və psixoloji dəyişikliklər hamiləlik zamanı baş verir. Bu kimi dəyişikliklərin baş verdiyi ən mühüm sahələrdən biri də ağız boşluğudur. Estrogen və progesteron kimi hormonların səviyyəsinin artması diş əti toxumalarında damar keçiriciliyini əhəmiyyətli dərəcədə artıraraq,əsas əlamətləri şişmiş və qanayan diş əti olan, gingivit və parodontit kimi ciddi diş əti xəstəliklərinə səbəb ola bilir. Hamiləliklə əlaqədar adətən hamiləlik epulisi kimi lokal və ya hamiləlik gingiviti kimi generalizə olunmuş zədələnmələr də müşahidə olunur. Bu zədələnmələr, adətən, hamiləlik bitdikdən sonra aradan qalxır. Lakin parodontiti olan qadınlarda klinik vəziyyətin daha da pisləşməsi ehtimal olunur. Diş əti xəstəlikləri olan hamilə qadınlar preeklampsiya, vaxtından əvvəl doğuş və normadan az çəkidə uşağın dünyaya gəlməsi kimi risklərə məruz qalır.
Hamiləlik dövründə qadınlar ağız boşluğu xəstəliklərinin əsas həyəcan siqnalı olan diş əti qanaması və iltihabı, çeynəmə zamanı ağrı, ağızdan xoşagəlməz qoxu, diş əti çəkilmələri ilə dişlərin laxlamasının artması kimi əlamətləri tanımalıdırlar və bu simptomların hər hansı birinin mövcudluğunda dərhal parodontoloqa müraciət etməlidirlər. Parodontoloji müayinə sırasında parodontoloq ağız boşluğu müayinəsini həyata keçirməklə, diş ərpi miqdarı, ciblərin dərinliyi və zondlama zamanı qanama kimi əsas göstəricilərin qiymətləndirilməsi, diş ətinin sağlamlıq statusu, xəstəlik mövcudluğunda dişlər ətrafında gingivit və ya parodontit, implantlar ətrafında isə peri-implant mukozit və ya peri-implantit diaqnozlarının qoyulması və nəzərdə tutulan müvafiq müalicə tədbirləri haqqında ətraflı məlumat verilir. Parodontoloq tərəfindən dişlər və implantlar ətrafında professional təmizliklər və subgingival instrumentasiyadan ibarət diş əti xəstəliklərinin qeyri-cərrahi müalicəsi və fərdi ağız boşluğu gigiyena maarifləndirilməsi, hamilə qadınları bu risklərdən qoruyaraq diş əti iltihabının qarşısının alınması və hamiləlik müddətində diş əti sağlamlığının qorunmasında effektiv olur. Hamiləlik sırasında diş əti xəstəliklərinin qarşısının alınması üçün dişlər və diş ətinin yumşaq fırça ilə gündə iki dəfə fırçalanması, həmçinin dişlərarası fırçalar/diş ipi hər gün mütəmadi olaraq istifadə olunması ilə yüksək səviyyəli ağız boşluğunun fərdi gigiyenası təmin olunması tövsiyə olunur. Mövcud elmi tədqiqatlar hamiləlikdən öncə həyata keçirilən diş əti müalicəsinin hamiləliyin qeyri-qənaətbəxş nəticələri riskinin qarşısının alınmasında təsirli olduğunu sübut edir.
Mama-ginekoloqlar isə qadınlarda ağız boşluğu müayinəsini mütəmadi müayinələr siyahısına daxil etməlidirlər, hamiləlik zamanı diş əti xəstəliklərinin mümkün riskləri və bu xəstəliklərin müalicəsinin bu risklərin aradan qaldırılmasına müsbət təsiri barədə ətraflı məlumat verməlidirlər. Müayinə sırasında diş və diş əti arasındakı nahiyədə qanamalar, xoşagəlməz qoxu, iltihab kimi əlamətlərin qiymətləndirilməsi üçün xəstənin ağız boşluğuna baxılmalı və birbaşa işıq altında ağız boşluğunun vəziyyətini yoxlanmalıdır. Bu əlamətlərdən hər hansı birinə rast gəlinərsə mövcud diş əti xəstəliklərinin diaqnozu və müalicənin təyin edilməsi üçün xəstə parodontoloqa yönləndirilməlidir. Həmçinin, hamiləliyin gedişinə və parodontun sağlamlığına mənfi təsir edən bir sıra ortaq risk amillər olduğundan (siqaret istifadəsi kimi) sağlam həyat tərzinə üstünlük verilməli və təbliğ olunmalıdır.
Avropa Parodontologiya Federasiyasının (EFP) ‘‘Oral Health and Pregnancy’’ maarifləndirmə kampaniyasının məqsədi Federasiyaya üzv olan 37 ölkənin Milli Parodontologiya Cəmiyyətləri tərəfindən həmin ölkələrdə hamiləlik dövründə qadınlarda ağız boşluğu sağlamlığınının təmin olunması üçün ən son elmi sübutlara əsaslanan tövsiyələr broşurları və video animasiya vasitəsi ilə qadınlarda, ağız boşluğu sağlamlığı və digər tibb mütəxəssislər arasında təşviq olunmasıdır. ‘‘Ağız boşluğu sağlamlığı və Hamiləlik’’ maarifləndirmə kampaniyası Avropa Parodontologiya Federasiyasının və Azərbaycan Respublikası Səhiyyə Nazirliyinin dəstəyi ilə Azərbaycan Parodontologiya Cəmiyyətinin prezidenti, Ə.Əliyev adına Azərbaycan Dövlət Həkimləri Təkmilləşdirmə İnstitutunun stomatologiya və üz-çənə cərrahiyyəsi kafedrasının dosenti Cavid Əhmədbəyli,Cəmiyyətin vitse-prezidenti və layihələr koordinatoru, Azərbaycan Tibb Universitetinin terapevtik stomatologiya kafedrasının assistenti Hənifə Musayeva və Cəmiyyətin baş katibi Vəfa Xanməmmədova tərəfindən qadınlar, ağız boşluğu sağlamlığı və digər tibb mütəxəssisləri üçün Azərbaycan dilində tərtib edilmişdir. www.perio.az/periohamilelik



Hörmətli dostlar!
Azərbaycanın və keçmiş Sovet məkanının qocaman ali tibb təhsil müəssisələrindən biri olan institutun saytına xoş gəlmisiniz.

Bizim institut 80 ildir ki, milli səhiyyənin, ümumilikdə ali tibb təhsilinin inkişafını, həkimlərin ixtisaslaşma və təkmilləşdirməsini müvəffəqiyyətlə təmin edir. İnstitut həkimlərin tibb təhsilində biliklərinin yüksəlməsi, fundamental təbabətin yeni nailiyyətlərinə yiyələnməsi, kliniki təcrübəyə diaqnostikanın müasir üsullarını tətbiq etməsinə nail olmağı öz üzərinə vəzifə kimi götürür. Bunlar da XXI əsrdə inkişaf edən təbabət elminin ayrılmaz atributları sayılır. İnstitutun ilk rektorları professor V.A. Tarnoqradski, M.M. Əfəndiyev və B.A. Ağayev olmuşdur. İnstitutun dirçəlməsində akademik Əziz Əliyevin böyük rolu olmuşdur. Kollektivin vəsadəti ilə Nazirlər Kabinetinin qərarı əsasında 1962-ci ildən institut onun adını daşıyır. Bu müddətdə M. Məmmədov, M.X. Yaqubov, S.M. Qusman, İ.İ. Lukov, S.Q. Şteyn, N.M. İsrafilova, P.P. Popov, S.İ.Vəlixan və s. kimi Azərbaycan təbabətinin istedadlı, yüksək ixtisaslı həkim kollektivi formalaşmışdır.

Davamını oxu



ONLAYN JURNAL


"Tibb və Elm"
Əziz Əliyev adına elmi-praktiki jurnal.

Tibb sahəsinin bütün bölmələri üzrə orijinal məqalələr qəbul edilir.





Copyright © , Azərbaycan Respublikası Səhiyyə Nazirliyi
Əziz Əliyev adına Azərbaycan Dövlət Həkimləri Təkmilləşdirmə İnstitutu



Saytın hazırlanması: Proqres IPX