Ə.Əliyev adına Azərbaycan Dövlət Həkimləri Təkmilləşdirmə İnstitutunda diplomdan sonrakı təhsil prosessində beynəlxalq təcrübənin tətbiqi ənənəvi hal almışdır. Kafedraların əməkdaşları beynəlxalq qurum və mütəxəssislərlə əməkdaşlıq çərçiəsində birgə müxtəlif konfrans və təlimləri təşkil edir, təqdimatlarla çıxış edirlər. Pandemiya dövründə bu fəaliyyət onlayn şəkildə davam etdirilir.
17 mart 2021-ci il tarixində institutun pediatriya kafedrasının 15-19 mart 2021-ci il tarixində keçirdiyi “Uşaqlar arasında geniş yayılan sümük-oynaq sistem xəstəlikləri” mövzusunda kurs çərçivəsində “Uşaqlar arasında qamət pozuntularının profilaktik və reabilitasiya tədbirlərində kinezioloji yanaşmalar” adlı onlayn vebinarı keçirilmişdir. Mövzunu Şimali Kipr Sağlamliq və Sosial Elmlər universitetinin fiziki tərbiyyə və idman fakültəsinin dekani, professor Şahin Əhmədov təqdim etmişdir. Vebinara 83 nəfər pediatr, istehsalat təcrübəsi keçən həkimlər və rezidentlər qatılmışlar. Təqdimatda ümumi kineziologiya elmi barədə, bədənin qamətinin formalaşmasında orqan, əzələ və sümük-oynaq sistemlərinin əlaqəli olduğuna dair şəkil və məlumatlar genış yer almışdı. Aktual mövzuya həsr edilən təqdimatda yer alan qamətin pozuntularının diaqnostika üsulları isə həkimlərin marağına səbəb olmuşdur. Sonda professor həkimlərin verdiyi sualları cavablandırmışdır.Professor Ş.Əhmədov Azərbaycanda uşaqlarda qamət pozuntularına dair institutun pediatriya kafedrası tərəfindən aparılacaq tədqiqatlarda özünün də yaxından iştirak edə biləcəyi haqqında fikrini bildirmişdir.