Azərbaycan səhiyyəsinə ağır itki üz vermişdir. Azərbaycan Respublikasının əməkdar elm xadimi, tibb elmləri doktoru, professor Nürəddin Bahadur oğlu Hümbətov 2020-ci il aprelin 24-də ömrünün 87-ci ilində vəfat etmişdir.
Nürəddin Bahadur oğlu Hümbətov 2 fevral 1933-cü ildə Gəncə şəhərində anadan olmuşdur. Azərbaycan Dövlət Tibb Universitetini bitirdikdən sonra 1957-1960-cı illərdə sahə həkimi kimi çalışmışdır. 1960-1963-cü illərdə Ə.Əliyev adına Azərbaycan Dövlət Həkimləri Təkmilləşdirmə İnstitutunun aspiranturasında təhsil almış,1963-cü ildən institutun terapiya kafedrasının assistenti, 1964-cü ildən dosenti, 1977-ci ildən professoru olmuşdur. 1979-2011-ci illərdə həmin kafedranın müdiri vəzifəsində çalışmışdır. Professor N.B.Hümbətov 1964-cü ildə namizədlik dissertasiyasını, 1975-ci ildə isə doktorluq dissertasiyasını müdafiə etmişdir.
Professor N.B.Hümbətovun rəhbərliyi altında terapiya və kardiologiyanın aktual məsələlərinə həsr olunmuş geniş elmi-tədqiqat işləri aparılmış və bunlar beynəlxalq əməkdaşlıq proqramı üzrə aparılan tədqiqatların bir hissəsini təşkil etmişdir. Onun təşəbbüsü ilə Respublikada 3 beynəlxalq simpozium keçirilmişdir. (1991, 1997, 1998). Professor Nurəddin Hümbətov dəfələrlə MDB və xarici ölkələrdə keçirilən qurultay, konqres və konfranslarda elmi məruzələrlə çıxış etmiş, əldə olunmuş yenilikləri müvəffəqiyyətlə səhiyyə praktikasına tətbiq etmişdir. Uzun illər Respublika Kardioloqlar Cəmiyyəti Rəyasət Heyətinin üzvü olmuşdur.
Professor N.B. Hümbətovun tibbi kadrlarının ixtisaslaşması və təkmilləşməsində, səmərəli elmi-tədqiqat işlərinin aparılmasında böyük xidmətləri olmuşdur. O, 27 namizədlik dissertasiyasının elmi rəhbəri, 4 doktorluq dissertasiyasının elmi məsləhətçisi olmuşdur. 200-dən çox elmi əsərin, 1 ixtira, 3 monoqrafiya, 27 metodik tövsiyə və 24 səmərələşdirici təkliflərin müəllifidir. Professor N.B.Hümbətov 1991-ci ildə Azərbaycan elminin inkişafında xidmətlərinə görə “Əməkdar elm xadimi” fəxri adına layiq görülmüşdür.
Tanınmış alim, savadlı həkim və elm təşkilatçısı professor Nurəddin Bahadur oğlu Hümbətovun xatirəsi onu tanıyanların qəlbində daim yaşayacaqdır.
Allah rəhmət eləsin!

Rektor professor N.A.Qasımov
Prorektor dosent Eyvazov T.H.
Prorektor dosent M.T.Meybəliyev
Terapiya kafedrasının müdiri t.e.d. V.A.Mirzəzadə