Azərbaycan Parodontologiya Cəmiyyətinin təşkilatçılığı ilə 12 oktyabr 2025-ci il tarixində Əziz Əliyev adına Azərbaycan Dövlət Həkimləri Təkmilləşdirmə İnstitutunda və Azərbaycan Tibb Universitetində Parodontologiya ixtisası üzrə təhsil alan rezidentlərlə yığıncaq keçirilmişdir.
Rezidentlər, Azərbaycan Parodontologiya Cəmiyyəti tərəfindən təşkil edilən və dişlər və implantlar ətrafında diş əti xəstəliklərinin diaqnostikası, qeyri-cərrahi və cərrahi müalicəsini əhatə edən 1 illik davamlı tibbi təhsil proqramı olan Parodontologiya Kurikulumunun “Dişlər və implantlar ətrafında yumşaq toxuma qüsurlarının taca istiqamətlənmiş dilim ilə bərpası” mövzusunda master-klassında iştirak etmişlər.
Tədbir Əziz Əliyev adına Azərbaycan Dövlət Həkimləri Təkmilləşdirmə İnstitutunun Parodontologiya kafedrasının dosenti, Azərbaycan Parodontologiya Cəmiyyətinin İdarə Heyətinin prezidenti Cavid Əhmədbəyli tərəfindən aparılmışdır.
Azərbaycan Respublikasının Səhiyyə Nazirliyi tərəfindən Davamlı Tibbi Təhsil üzrə 8 bal ilə akkreditasiya olunmuş bu master-klassda nəzəri biliklərlə yanaşı, bioloji modellər üzərində tikiş texnikaları, taca istiqamətlənmiş dilim texnikası üsulu və Mucoderm (Botiss) yumşaq toxuma qreftinin tətbiqi praktiki şəkildə nümayiş etdirilmişdir.