11-14 iyun 2025-ci il tarixində İtaliyanın Neapol şəhərində İtaliya Üz-çənə Cərrahiyyəsi Cəmiyyətinin 24-cü Konqresi keçirilmişdir. Konqresin əsas mövzusu “Yeni Texnologiyalar” və son illərdə inkişaf etdirilən bütün mümkün klinik tətbiqlər və təkamüllər olmuşdur. Konqres robototexnikadan naviqasiyaya, süni intellektə qədər müxtəlif sahələrdəki bütün yenilikləri əhatə etmişdir. 3 gün davam edən tədbirin proqramına daxil edilmiş mühazirələr, milli və beynəlxalq qonaqlarla simpoziumlarda ixtisasın aktual problemləri, o cümlədən ortognatik cərrahiyyə və üz-çənə nahiyyəsinin xərçəng xəstəlikləri müzakirə edilmişdir.
Konqresdə Ə.Əliyev adına Azərbaycan Dövlət Həkimləri Təkmilləşdirmə İnstitutunun stomatologiya və üz-çənə cərrahiyyəsi kafedrasının rezidenti Günel Mustafayeva “Reconstruction of Maxillofacial deformity in a Patient with Acromegaly by Orthognathic Surgery: Case Report” mövzusunda çıxış etmişdir. Həmin mövzuda institutun stomatologiya və üz-çənə cərrahiyyəsi kafedrasının müdiri dosent Həsən Əsədov və Günel Mustafayevanın birlikdə yazdıqları məqalə konqresin məcmuəsində də çap olunmuşdur.