Azərbaycanda ilk dəfə !
«Tibbi kosmetologiya» ixtisası üzrə kurs keçiriləcəkdir

Azərbaycan Respublikası Səhiyyə Nazirliyinin Ə.Əliyev adına Azərbaycan Dövlət Həkimləri Təkmilləşdirmə İnstitutu Rusiya Diplomdansonrakı Tibb Akademiyası ilə birgə 29 sentyabr 2021-ci il-14 mart 2022-ci il tarixlərdə Respublika Diaqnostika Mərkəzinin bazasında ilk dəfə olaraq «Tibbi kosmetologiya» ixtisası üzrə 6 aylıq ödənişli əsaslarla «Tibbi kosmetologiya» mövzusunda yenidən hazırlıq kursları keçirəcəkdir. Kursa bu sahədə çalışan həkimlər qəbul olunur. Kursun məqsədi «Tibbi kosmetologiya» ixtisası üzrə fəaliyyət göstərən həkimlərin təhsil və peşə ehtiyaclarının ödənilməsi, bilik, bacarıq və təcrübi vərdişlərinin mənimsənilməsinin və müasir standartlara uyğunluğunun təmin olunmasıdır. Kurs müddətində qeyri-invaziv və invaziv, həmçinin apparat metodlarından istifadə edərək müalicə prosedurlarının aparılması, dırnaq lövhələrinin işlənilməsi prosedurunun yerinə yetirilməsi, destruksiyaların aparılması (elektro-lazer, radiodalğalı koaqulyasiya, kriodestruksiya) və dəridə yenitörəmələrin mexaniki götürülməsi bacarıqları mənimsəniləcəkdir.
Kursu müvəffəqiyyətlə bitirmiş şəxslərə ilk dəfə olaraq ixtisasa buraxılışı təsdiqləyən müvafiq dövlət sənədi təqdim olunacaqdır.
Kursa qəbul olunmaq üçün Ə.Əliyev adına Azərbaycan Dövlət Həkimləri Təkmilləşdirmə İnstitutunun Tədris hissəsinə müraciət etmək lazımdır.

Ünvan: 20 yanvar dairəsi, Müzəffər Həsənov 35 (Azərsu ASC ilə üzbəüz)
Əlaqə nömrəsi: Tədris Hissəsi 012-565-04-28, Mob: 050-407-22-07
E-poçt: adhti.tedris@gmail.com

Kursa qəbul olunmaq üçün aşağıdakı sənədlər tələb olunur:
1. Diplom (əsli və surəti)
2. İnternatura (əsli və surəti)
3. Əmək kitabçası (əsli və surəti)
4. Şəxsiyyət vəsiqəsi (əsli və surəti)

Hörmətli dostlar!

Azərbaycanın və keçmiş Sovet məkanının qocaman ali tibb təhsil müəssisələrindən biri olan institutun saytına xoş gəlmisiniz.

Bizim institut 80 ildir ki, milli səhiyyənin, ümumilikdə ali tibb təhsilinin inkişafını, həkimlərin ixtisaslaşma və təkmilləşdirməsini müvəffəqiyyətlə təmin edir. İnstitut həkimlərin tibb təhsilində biliklərinin yüksəlməsi, fundamental təbabətin yeni nailiyyətlərinə yiyələnməsi, kliniki təcrübəyə diaqnostikanın müasir üsullarını tətbiq etməsinə nail olmağı öz üzərinə vəzifə kimi götürür. Bunlar da XXI əsrdə inkişaf edən təbabət elminin ayrılmaz atributları sayılır. İnstitutun ilk rektorları professor V.A. Tarnoqradski, M.M. Əfəndiyev və B.A. Ağayev olmuşdur. İnstitutun dirçəlməsində akademik Əziz Əliyevin böyük rolu olmuşdur. Kollektivin vəsadəti ilə Nazirlər Kabinetinin qərarı əsasında 1962-ci ildən institut onun adını daşıyır. Bu müddətdə M. Məmmədov, M.X. Yaqubov, S.M. Qusman, İ.İ. Lukov, S.Q. Şteyn, N.M. İsrafilova, P.P. Popov, S.İ.Vəlixan və s. kimi Azərbaycan təbabətinin istedadlı, yüksək ixtisaslı həkim kollektivi formalaşmışdır.

Davamını oxu