Dünyanın bütün ölkələrində olduğu kimi Azərbaycan Respublikasında da stasionardan kənar yardım əhaliyə göstərilən tibbi yardımlar sırasında mühüm və başlıca yer tutur. Bu yardımın əsasını ailə təbabəti təşkil edir. ÜST-nın Avropa Regional Bürosunun Lyublyana konfransı (2001) qərarlarına uyğun olaraq Avropanın bir çox ölkələrində olduğu kimi Azərbaycanda da “Ailə təbabəti” proqramı üzrə milli strategiyanın hazırlanması barədə Azərbaycan Səhiyyə Nazirinin 2002-ci il 12 iyun tarixli 69 saylı əmri verilmişdir. Bu strategiyaya uyğun olaraq səhiyyə və tibbi təhsil sahəsində aparılan islahatlara müvafiq olaraq Respublikada əhaliyə göstərilən tibbi xidmətin keyfiyyətini daha da yüksəltmək üçün ilkin tibbi yardım müəssisələrində ümumi həkim (ailə) praktikasının tətbiqinin təmin edilməsi vacib sayılmış və ailə həkimliyi prinsipi cəmiyyətin inkişafından irəli gələn və icrasına ehtiyacı olan bir proses kimi yayılmağa başlanmışdır. Bunlarla əlaqədar Ə.Əliyev adına Azərbaycan Dövlət Həkimləri Təkmilləşdirmə İnstitutunda ümumi praktika (ailə) həkimlərinin diplomdansonrakı hazırlığı üçün tədris proqramları hazırlanmış və müvafiq kafedra açılmışdır.
İnstitutda eyni zamanda ailə təbabəti prinsipləri müvəffəqiyyətlə tətbiq olunmuş və artıq uzun illər çalışan bir sistemi olan ölkələrin təcrübəsi daim öyrənilir və istifadə edilir. Ölkəmizdə səfərdə olan Türkiyənin Mərmərə Universitetinin ailə həkimliyi kafedrasının nümayəndələri professor Arzu Uzuner və professor Mehmet Akmanla institutumuzda baş tutan görüşdə də bu məsələlər diqqət mərkəzində olmuşdur. Ə.Əliyev adına ADHTİ-nun rektoru professor N.A.Qasımov bildirmişdir ki,ailə həkimi institutunun səhiyyə sistemi çərçivəsində rolunun artırılması, pasiyent yönümlü yanaşmanın tətbiq olunması, ilkin səhiyyə müəssisələrinin maddi-texniki bazasının beynəlxalq standartlara uyğunlaşdırılması, xəstəliklərin profilaktikasında ailə həkimi institutunun rolunun artırılması və səhiyyə xərclərinin rasional istifadəsinin təmin edilməsi ümumilikdə ailə həkimi institutunun inkişaf perspektivləri kimi qiymətləndirilir.Bu prinsiplərin həyata keçirilməsi üçün ailə həkimi ixtisasının tədris metodologiyasının və təcrübəsinin daha da təkmilləşdirilməsinə zərurət yaranır. Təbii ki, müvafiq tədris planı və dərs vəsaitlərinin beynəlxalq təcrübəyə əsaslanaraq tərtib olunmasına, ixtisasartırma istiqamətində mübadilə proqramlarının həyata keçirilməsinə də ehtiyac duyulur. Ona görə də müəssisələrimiz arasında əlaqələrin genişlənməsi qardaş Türkiyədə qazanılmış təcrübədən ölkəmizdə istifadə olunmasına köməklik edəcəkdir.
Çıxış edən professor Arzu Uzuner və professor Mehmet Akman da əldə olunmuş nailiyyətlərlə bölüşməyin çox önəmli olduğunu və gələcəkdə bütün istiqamətlərdə qarşılıqlı əməkdaşlıq etmək arzusunda olduqlarını qeyd etdilər.