Azərbaycan Kardiologiya Cəmiyyətinin konfransı keçirildi

21.10.2019

18 oktyabr 2019-cu il tarixində Azərbaycan Kardiologiya Cəmiyyətinin (AKC) “Kardiovaskulyar Farmakoterapiya” və “Diabet və ürək-damar xəstəlikləri” İşçi Qruplarının aylıq konfransı keçirildi. Tədbirin məqsədi Avropa və ABŞ-da hazırlanıb dərc edilmiş yeni kliniki tövsiyələrlə həkimləri tanış etmək və praktik fəaliyyətdə bu tövsiyələri tətbiq etmək olmuşdur.
Konfransı AKC-nin sədri professor Tofiq Cahangirov açdı.Sonra Ə.Əliyev adına Azərbaycan Dövlət Həkimləri Təkmilləşdirmə İnstitutunun terapiya kafedrasının müdiri, t.e.d. Valeh Mirzəzadə çıxış edərək “Amerika Diabet Assosiasiyası və Diabetin Öyrənilməsi üzrə Avropa Assosiasiyasının Konsensus tövsiyələri” barədə ətraflı məlumat verdi. İkinci məruzəçi Ə.Əliyev adına Azərbaycan Dövlət Həkimləri Təkmilləşdirmə İnstitutunun ailə təbabəti kafedrasının professoru t.e.d. İ.Ələkbərov “Arterial hipertenziyanın farmakoterapiyasına yeni Avropa tövsiyələrinə əsasən yanaşma” adlı mühazirə ilə çıxış etdi. Növbəti çıxışçı “ESC 2019. Diabet, Pre-diabet və Kardiovaskulyar xəstəliklərə dair yeni kliniki rəhbər tövsiyələri” adlı məruzəsi ilə həkim-endokrinoloq F.Yaqubova oldu. Sonda hər üç mühazirəçiyə çoxsaylı suallar verildi, çıxışlar ətrafında müzakirələr oldu.

Hörmətli dostlar!

Azərbaycanın və keçmiş Sovet məkanının qocaman ali tibb təhsil müəssisələrindən biri olan institutun saytına xoş gəlmisiniz.

Bizim institut 80 ildir ki, milli səhiyyənin, ümumilikdə ali tibb təhsilinin inkişafını, həkimlərin ixtisaslaşma və təkmilləşdirməsini müvəffəqiyyətlə təmin edir. İnstitut həkimlərin tibb təhsilində biliklərinin yüksəlməsi, fundamental təbabətin yeni nailiyyətlərinə yiyələnməsi, kliniki təcrübəyə diaqnostikanın müasir üsullarını tətbiq etməsinə nail olmağı öz üzərinə vəzifə kimi götürür. Bunlar da XXI əsrdə inkişaf edən təbabət elminin ayrılmaz atributları sayılır. İnstitutun ilk rektorları professor V.A. Tarnoqradski, M.M. Əfəndiyev və B.A. Ağayev olmuşdur. İnstitutun dirçəlməsində akademik Əziz Əliyevin böyük rolu olmuşdur. Kollektivin vəsadəti ilə Nazirlər Kabinetinin qərarı əsasında 1962-ci ildən institut onun adını daşıyır. Bu müddətdə M. Məmmədov, M.X. Yaqubov, S.M. Qusman, İ.İ. Lukov, S.Q. Şteyn, N.M. İsrafilova, P.P. Popov, S.İ.Vəlixan və s. kimi Azərbaycan təbabətinin istedadlı, yüksək ixtisaslı həkim kollektivi formalaşmışdır.

Davamını oxu